धनकुटामा बन्यो नेकपाको वडा कमिटी, टुंगियो सबै वडामा पार्टी एकता प्रक्रिया
धनकुटा । पार्टी एकतापछि कार्यकर्ता समायोजनमा समस्या आइरहेका बेला धनकुटामा भने वडा तहसम्म एकता प्रक्रिया टुंगिएको छ ।
नेपाल कम्युनिस्ट पार्टी (नेकपा) का केन्द्रिय सदस्य हेमराज भण्डारीको पहलमा धनकुटाका सबै वडामा पार्टी एकता प्रक्रिया टुंगिएको हो । धनकुटाका सात स्थानीय तहमा ६० वटा वडा छन् ।
तत्कालीन नेकपा एमाले र माओवादी केन्द्रबीच एकता भएपछि जिल्ला र स्थानीय तहमा अझैं एकता हुन सकिरहेको छैन । बल्लबल्ल प्रदेश कमिटीले भने बुधबार पूर्णता पाएको छ । धनकुटामा भने प्रदेशले नै पूर्णता नपाउँदै एकसाता अघि नै वडा तहमा एकता भइसकेको छ ।
जिल्लामा सबैलाई एक बनाउन भण्डारीकै पहलमा तिहारअघि सात वटै तहमा दुवै पार्टीबाट ४/४ जना सदस्य सम्मिलित कार्यदल बनाएको थियो । धनकुटामा केन्द्रमा भएको सहमतिअनुसार सबै वडामा २९ सदस्य वडा कमिटी बनेको हो ।
एकता प्रक्रियाका बेला बनाइएको निर्देशिकामा वडामा २९, गाउँपालिकामा ७५, नगरपालिकामा ८१, उपमहानगरपालिकामा १ सय १ र महानगरपालिकामा १ सय २५ सदस्य कमिटि बन्ने उल्लेख छ ।
अब चाँडै स्थानीय तह र जिल्लामा एकता प्रक्रिया टुंग्याउने तयारी भइरहेको केन्द्रिय सदस्य भण्डारीले बताए । भण्डारी पहिलो संविधानसभाको निर्वाचनमा धनकुटा क्षेत्र नं. १ बाट विजयी भएका थिए ।
