यलम्वरहाङको शालिक पुरा गर्न रकम अभाव
धनकुटा खबर । धनकुटामा निर्माणाधिन यलम्वरहाङको शालिक निर्माण पूरा गर्न अन्तिम समयमा रकम अभाव भएको छ ।
धनकुटा नगरपालिका ६ राईकुवा टोल स्थितको साकेला शान्ति पार्कमा वनाईदै गरेको यो शालिकको निर्माण कार्य यसअघि पौष मसान्त सम्ममै सक्ने भनिएको भएपनि माघ मसान्त सम्मका लागि समय थप गरिएको थियो । तर यस अवधिमा पनि आवश्यक रकम अपुग हुँदा अझ समय थप गर्नुपर्ने सम्भावना वढेको किराँत राई यायोख्खा धनकुटाका अध्यक्ष नगेन्द्र राईले वताउनुभयो ।
यो शालिक निर्माणका लागि यसअघि धनकुटा नगरपालिका, जिल्ला प्राविधिक कार्यलय लगायत विभिन्न संस्थावाट प्राप्त करिव ११ लाख वरावर रकम लागिसकेको छ । अव थप ५ लाखमा काम पूरा हुने अनुमान गरिएको छ ।
रकम अभावकै कारण किराँतीहरुको पहिलो राजा यलम्वरहाङको मूर्ति पनि धनकुटा सम्म ल्याउन समस्या भएको छ । ३ लाखमा सम्झौता भएको यलम्वरहाङको पूर्णकदको मूर्ति धरानवाट ल्याउनु पर्ने हो । तर रकम अभाव भएपछि यी सवै काम पूरा गर्न सहयोग गर्न किराँत राई यायोख्खा जिल्ला कार्य समिति धनकुटाले सवैलाई अनुरोध गरेको छ ।
समितिले पनि सहयोग संकलनका लागि जिल्लाको स्थानिय तह लगायतका संस्थामा अनुरोध गर्ने र घरदैलो कार्यक्रम समेत सञ्चालन गर्ने तयारी गरेको अध्यक्ष राईले जानकारी दिनुभयो ।
