नेपाल औषधि व्यवसायी संघको तीन जिल्लाको संयूक्त प्रथम जिल्ला अधिवेशन धनकुटामा सम्पन्न,अध्यक्षमा पोखरेल निर्वाचित
धनकुटा,चैत ९ । नेपाल औषधि व्यवसायी संघको तीन जिल्लाको संयूक्त प्रथम जिल्ला अधिवेशन आज धनकुटामा सम्पन्न भएको छ । नेपाल औषधि व्यवसायी संघ कोशि अञ्चलको आयोजनामा आज धनकुटाको हिलेमा धनकुटा, भोजपुर र तेह्रथुम जिल्लाको संयूक्त अधिवेशनबाट नगेन्द्र पोखरेल अध्यक्षमा निर्वाचित हुनु भएको छ ।
निवार्चन अधिकृत लाखमान राईको निवार्चन मण्डलले नगेन्द्र पोखरेल अध्यक्षमा निर्वाचित भएको घोषणा गर्नु भएको थियो । त्यस्तै गरी उपाध्यक्षमा धन बहादुर बराल ,सचिवमा बलाराम खड्का, कोषाध्क्षमा श्रवण शाह,सह(कोषाध्यक्ष सान्ति देवान लिम्बु, लगायत गरी जम्मा १० सदस्य कार्यसमिति निर्माण गरिएको सचिव खड्काले जानकारी दिनु भयो ।
अधिवेशनका प्रमुख अतिथि प्रदेश १ सांसद निरन राइले बोल्दै मुलुकलाई समृद्ध नेपाल,सुखी नेपाली बनाउने परिकल्पनालाई साकार पार्न सरकार र जनप्रतिनिधिको चाहानाले मात्र सम्भव नरहेको भन्दै यसमा नीजि क्षेत्रका लगानी कर्ता, व्यवसायीहरु एक हुन आवश्यक रहेको बताउनु भयो । त्यस्तै उहाँले देशलाई धनी र समृद्ध बनाउनका निम्ति मानिस स्वस्थ्य हुन जरुरी रहेको भन्दै औषधि व्यवसायी संघले त्यस भित्र रहेका विभिन्न समस्या समाधान गरेर अघाडि बढ्न आग्रह गर्नु भयो ।
नेपाल औषधि व्यवसायी संघ कोशि अञ्चलका अध्यक्ष कुमार खतिवडाको अध्यक्षतामा सम्पन्न भएको अधिवेशनमा ताप्लेजुङ पाँचथरका औषधि व्यवसायी संघका अध्यक्ष सुनदर मोहोन शाक्य, मेचिअञ्चल शाखा अध्यक्ष नरेन्द्र बस्नेत,केन्द्रिय सदस्य सर्मिला शाक्य र औषधि व्यवस्थापन विभाग विराटनगरका प्रमुख सञ्जिव कटुवाल लगायतले शूभकामना मन्तव्य राखेका थिए ।
