निःशुल्क आयुर्वेदिक उपचार सेवा शूरु
धनकुटा,बैशाख ७ । धनकुटाको महालक्ष्मी नगरपालिका जितपुरमा निःशुल्क आयुर्वेदिक उपचार सेवा शूरु भएको छ । नागरिक आरोग्य सेवा केन्द्र स्थापना गरी जितपुर बजारमा निःशुल्क उपचार सेवा प्रदान गर्न थालिएको हो ।
एक कार्यक्रमका बीच औपचारिक रुपमा आरोग्य केन्द्र उद्घाटन गरेर सेवा शूभारम्भ गरिएको हो । कार्यक्रममा प्रदेश सांसद इन्द्रमणी पराजुली, जिल्ला समन्वय समितिका प्रमुख टंक चौहान, महालक्ष्मी नगरपालिकाका प्रमुख पर्शुराम नेपाल, उप–प्रमुख मञ्जु अधिकारी, महालक्ष्मी–७ का वडाध्यक्ष रुद्र तुम्वा लगायतले आयुर्वेदिक उपचार सेवावाट नगरबासीले धेरै फाइदा लिन सक्ने वताएका छन् ।
धनकुटा सदरमुकाम स्थित कोशी अञ्चल आयुर्वेदिक औषधालय मातहत रहने गरी आरोग्य सेवा केन्द्र स्थापना गरिएको हो । जितपुर बजारकोे केन्द्रबाट आयुर्वेदिक उपचार सहित औषधि पनि निःशुल्क प्रदान गरिने महालक्ष्मी नगरपालिकाका प्रमुख नेपालले जानकारी दिनुभयो । उहाँले निःशुल्क आयुर्वेदिक उपचार सेवावाट फाइदा लिन नगरबासीलाई आग्रह पनि गर्नुभएको छ ।
यो सँगै कोशी अञ्चल आयुर्वेदिक औषधालय मातहत रहने गरी धनकुटा जिल्ला सदरमुकाम बाहिर दुई ठाउँमा सेवा विस्तार गरिएको छ । यसअघि चौविसेको राजारानीमा पनि केन्द्र स्थापना गरी उपचार सेवा प्रदान गरिदै आएको छ ।
