कोभिड १९ को रोकथाम तथा नियन्त्रणका लागि जनचेतना मुलक अभियान शुरु
विराटनगर । प्रदेश १ सरकारले आजदेखि प्रदेशभर कोभिड १९ को रोकथाम तथा नियन्त्रणका लागि जनचेतना मुलक अभियान शुरु गरेको छ ।
विराटनगर वसपार्कबाट अभियानको शुरुवात गरिएको हो । कोरोनाको दोश्रो लहर शुरु भएसँगै संक्रमितको संख्या बढ्दै गएपनि स्वास्थ्य मापदण्ड पालना नभएपछि मन्त्रालयले सांकेतिक रुपमा अभियानको शुरुवात गरेको जनाएको छ ।
सामाजिक विकास मन्त्रालयको अगुवाई र स्काउट लगायतका सामाजिक संघ संस्थाको सहकार्यमा अभियानको शुरु गरिएको हो ।
अभियानको शुभारम्भ गर्दै सामाजिक विकास मन्त्री उषाकला राईले कोरोनाबाट बच्न स्वास्थ्य मापदण्डको पालना, सामाजिक दूरी कायम गर्न आवश्यक रहेकोमा जोड दिनुभयो । उहाँले सरकारले जारी गरेको स्वास्थ्य मापदण्ड अनिवार्य पालना गर्न आग्रह गर्नुभयो ।
सवैको सहयोगले मात्र कोरोना नियन्त्रण सम्भव रहेको भन्दै सामाजिक चेतनाका लागि कोरोना नियन्त्रणको अभियान थालिएको बताउनुभयो । उहाँले विना मास्क हिड्नेहरुलाई मास्क लगाई दिनु भएको थियो ।
