एमाले महाधिवेशन : एमाले सचिवमा उम्मेदवारी दिने शेरधन राईको घोषणा
चितवन, ९ मंसिर ।एमाले पोलिटव्युरो सदस्य एवं प्रदेश नं १ का पूर्वमुख्यमन्त्री शेरधन राईले एमालेको सचिवमा उम्मेदवारी दिने बताएका छन् । भोलिदेखि चितवनमा सुरु हुन लागेको एमालेको १०औँ महाधिवेशनमा सहभागी हुन बिहीबार भरतपुर आइपुगेका राईले सचिवमा उम्मेदवारी दिनेगरी तयारी गरेको प्रतिक्रिया दिए ।
एमालेले यसअघि विधान अधिवेशन गरिसकेको छ । नयाँ नेतृत्वका लागि राष्ट्रिय महाधिवेशन गर्न लागेको हो । एमालेको नवौँ राष्ट्रिय महाधिवेशनबाट राई पोलिटव्युरो सदस्यमा निर्वाचित भएका हुन् । ‘यसपटक राष्ट्रिय महाधिवेशनमा आफूलाई सबैभन्दा कान्छो पदाधिकारीको रूपमा प्रस्तुत गर्ने निधो गरेको छु । त्यो भनेको हामीले विधान महाधिवेशनमा सात जना सचिवको व्यवस्था गरेका छौँ । त्यो सातमध्ये एउटा सचिवमा आफ्नो उम्मेदवारी प्रस्तुत गर्ने तयारी गरेको छु’, उनले भने ।
एमालेले यसपटक महाधिवेशनलाई एकता र सहमतिको महाधिवेशनका रूपमा सम्पन्न गर्ने संकल्प गरेको उनले बताए । त्यसैअनुरूप नेतृत्वलगायतका नेताहरूले पहलकदमी लिएको उनको भनाइ छ ।
कांग्रेस खोटाङको सभापतिमा सर्वधन अगाडि
खोटाङ, ९ मंसिर ।नेपाली कांग्रेस खोटाङको सभापतिमा पूर्व पर्यटन तथा नागरिक उड्यान राज्यमन्त्री सर्वधन राईले अग्रता लिएका छन् । तीन सय मत गणना हुँदा राईले अर्का उम्मेदवार पूर्व सभापति बिष्णुकुमार राईलाई सात मतले पछि पारेका हुन् ।
सर्वधन राईले एक सय ४९ मत पाउँदा बिष्णुकुमार राईले एक सय ४२ मत पाएका छन् । दुई सय मत गन्णदा १० मतले अघि रहेका बिष्णुकुमार तीन सय मत गणना हुँदा सात मतले पछि परेको जिल्ला निर्वाचन अधिकृतको कार्यालयले जनाएको छ । मत गणना बिहिबार बिहानदेखि सुरू गरिएको हो । यहाँ एक हजार तीन सय ३२२ मत खसेको थियो । प्रत्येक सय मत गणनापछि नतिजा सार्वजनिक गर्ने व्यवस्था मिलाइएको छ ।
जिल्ला सभापतिका लागि शेरबहादुर देउवा निकट पूर्वराज्यमन्त्री सर्रावधन राई र रामचन्द्र पौडेल निकट पूर्व सभापति बिष्णुकुमार राई आमनेसामने भएका हुन् । सर्रावधन राईको प्यानलबाट उपसभापतिमा मनोज तिम्सिना र राजन शैंजू, सचिवमा रोजन राई र राम साम्पाङ, सह–सचिवमा ध्यानबहादुर राई र राजकुमार राई चुनावी मैदानमा छन् । यस्तै, पूर्व सभापति बिष्णुकुमार राईको प्यानलबाट उपसभापतिमा इवन राई र तिर्थराज भट्टराई, सचिवमा ज्ञानेन्द्र जोशी र समिर राई, सह-सचिवमा सार्जन राई र शालिकराम बञ्जराको मनोनयन पत्र दर्ता भएको छ ।
