खोटाङ र उदयपुर जोड्ने फोक्सिङटारमा अस्थायी बेलिब्रिज जडान
खोटाङ, २ पुस /खोटाङ र उदयपुर जोड्ने सुनकोसीस्थित फोक्सिङटारमा अस्थायी बेलिब्रिज जडान गरिएको छ । खोटाङलाई पूर्वी सहरसँग जोड्ने दिक्तेल-गाईघाट सगरमाथा राजमार्ग अन्तर्गत खोटाङको खोटेहाङ गाउँपालिका-९ लिच्कीराम्चे र उदयपुरको रौतामाई गाउँपालिका-५ आँपटार जोड्ने सुनकोसीस्थित फोक्सिङटारमा अस्थायी बेलिब्रिज जडान गरिएको हो । गाईघाट-दिक्तेल सडक आयोजनाको ६८ लाखमा रेग्मी-भानुमती-चौधरी जेभीले मंसिर दोस्राे सातादेखि जडान सुरु गरेको अस्थायी बेलिव्रिज बिहीबारदेखि सञ्चालनमा ल्याइएको हो ।
हिउँदभरी सञ्चालन गर्ने र वर्षामा झिक्नेगरी फोक्सिङटारमा करिब ५० मिटर लम्बाई भएको अस्थायी बेलिब्रिज जडान गरिएको हो । ‘स्काभेटर वारपार गराएर टेष्ट गरियो । लाइट गाडी र ट्याक्टर वारपार गर्न सुरु गरेको छ,’ गाईघाट-दिक्तेल सडक कार्यालय उदयपुरका प्रमुख इन्जिनियर (डिई) गोपाल खकुरेलले भने, ‘भोलीबाट हेभीवेटका गाडी चल्न थाल्ने छन् ।’ नदीमा पानीको वहाव बढ्न थालेपछि सो स्थानको बेलिब्रिज गत जेठमा निकालिएको थियो ।
१०१ किलोमिटर लामो गाईघाट–दिक्तेल सडक खण्डमा पर्ने फोक्सिङटारमा बेलिब्रिज सञ्चालनमा आएसँगै दिक्तेलबाट सिधै गाईघाट हुँदै धरान, बिराटनगर लगायतका सहर जाने दोस्राे र छोटो बाटो खुलेको छ । फोक्सिङटारमा बेलिब्रिज नहुँदा जिल्लावासी दिक्तेलबाट घुर्मी-कटारी हुँदै पूर्वी सहर आउने र जाने गरेका छन् ।
पक्की पुल निर्माणमा चरम ढिलासुस्ती
फोक्सिङटारमा निर्माणाधिन पक्की आर्क डिजाइनको पुलको काममा ठेकेदारको चरम ढिलासुस्ती भएपछि सो स्थानमा विगत ६ वर्षदेखि बेलिब्रिज राख्ने गरिएको छ । फोक्सिङटारको पक्की पुल निर्माणकाे काममा ढिलासुस्ती भइरहेको अवस्थामा अस्थायी बेलिब्रिज राख्ने गरिएको छ ।
निर्माण कम्पनी गौरी पार्वती वाईपी जेभीको ढिलासुस्तीका कारण दुई पटक म्याद गुज्रदा समेत फोक्सिङटारस्थित सुनकोसीको पक्की पुलको काम पूरा हुन सकेको छैन । म्याद गुज्रेको वर्षौ बित्दा समेत पक्की पुलको पिलर ठड्याउने काम समेत पूरा हुन नसकेको अवस्थामा फोक्सिङटारमा बेलिब्रिज राख्ने र हटाउने काममै नेपाल सरकारको वार्षिक करोडौँ खर्च भइरहेको छ ।
