अध्यक्ष नेपाल-लोकतन्त्रवादी शक्ति एक भएर जानुपर्छ
विराटनगर, २१ चैत । नेकपा (एकीकृत समाजवादी) पार्टीका अध्यक्ष एवं पूर्वप्रधानमन्त्री माधवकुमार नेपालले लोकतन्त्रवादी शक्ति एक भएर जानुपर्ने बताउनुभएको छ ।विराटनगर विमानस्थलमा आज सञ्चारकर्मीसँग सङ्क्षिप्त कुराकानी गर्दै उहाँले आसन्न स्थानीय तहको निर्वाचनमा लोकतन्त्रवादीको गठबन्धन हुने बताउनुभयो । उहाँले विगत सरकारले प्रतिगमन निम्त्याएको र अह्मकारी बनेकाले नै गठबन्धनको आवश्यकता परेको आरोप लगाउनुभयो ।
‘विनविन’को सिद्धान्तले गठबन्धन हुन्छ भन्दै पूर्वप्रधानमन्त्री नेपालले नेकपा(एकीकृत समाजवादी) नै असली कम्युनिष्ट पार्टी भएकाले मतदाताले कलम चिह्नमा अपार मत हाल्ने विश्वास व्यक्त गर्नुभयो । उहाँले युक्रेन र रुसको समस्या जटिल भएकाले यसको समाधान बहस र छलफलबाट टुङ्गो लगाउनुपर्ने धारणा राख्नुभयो ।
यो पनि पढ्नुहोस…कपिलवस्तु, जिल्लाको सबैभन्दा ठूलो बाणगङ्गा नदीले बनाएको बगर क्षेत्रमा स्थानीय कृषकले खेती गर्दै आएका छन् । नदीको किनारमा रहेको सुक्खा बालुवामय बगरमा उनीहरुले खेती गरी जीवन निर्वाह गर्दै आएका हुन् । चिसो फल तरबुजा, खरबुजा, काँक्रो, घिराँैला, लौका, फर्सी तथा तरकारी उत्पादन गरी आफूहरुले जीवन निर्वाहको माध्यम बनाएको सिहोखोरका किसान रामअसरे केवटले बताउनुभयो । बगरबाट जीविकोपार्जन गर्न बाध्य रहेका भूमिहीन अन्य किसानले त्यसबाट राम्रो आम्दानीसमेत गर्न सफल भएको बताए ।
जिल्लाको बुद्धभूमि, कपिलवस्तु र महाराजगञ्ज नगरपालिका तथा यशोधरा गाउँपालिकाका किसान बगरे खेतीमा सम्लग्न भएको पाइन्छ । जिल्लामा बाणगङ्गाा नदी किनारमा रहेको धनकौली, चेतरादेइ, विजगौरी, बरगदी, बरगदा, पडरिया, पारसडिहवा र हरदौनालगायत गाउँका कृषक पनि बगर खेतीमा सम्लग्न छन् । पडरियाका शिवशङ्कर लोनिया भन्नुहुन्छ, “नदीको बगरमा काँक्रो, तरबुजा तथा लौका, घिरौँला, करेला, फर्सीलगायतको खेतीबाट एक याममा रु ५० हजारभन्दा बढी आम्दानी गर्ने गरेको छु ।” चैतको गर्मीमा पनि बालुवाको तापलाई पन्छाउँदै यतिखेर बढी माग भएका फलफूल र तरकारीको स्याहारमा जुटेका बरगदीका पल्टन मुराउले आफूहरुले उत्पादन गरेका फल तथा तरकारीेले राम्रो भाउसमेत पाएको बताउनुभयो ।
यो बगरमा जस्तै जिल्लाको करिब तीन सय बिघा जमिनमा बगरे खेती हुने गरेको जिल्ला कृषि समन्वय इकाइले जनाएको छ । जिल्लाका किसान यो समयमा बाणगङ्गा नदीको किनारमा रहेको बगरे खेतीतर्फ आकर्षित भएका हुन् । छोटो समयमा विभिन्न तरकारीका जातहरु लगाएर उत्पादन गर्न सकिने भएकाले किसानहरु उक्त खेतीतर्फ आकर्षित भएका हुन् । ती स्थानमा मात्र बगरे खेती भइरहेकामा भारतसँग जोडिएका दक्षिणी गाउँहरुमा समेत यस वर्षदेखि बगरे खेती गर्न थालिएकोे छ ।
हरदैना र कजरहवा, धनकौली महाराजगञ्ज, सिसवा, सिहोखोरलगायत स्थानमा समेत खेती गर्न थालिएको छ । खेर गइरहेको नदी किनारामा सानो लगानी गरेर उत्पादन लिन सकिने भएकाले बगरे खेतीको अवधारणाअनुसार कार्यक्रम सुरु गरिएको किसानहरुले बताए । अझ बीउबिजन सिँचाइ, तालिम पाए तरकारी खेती राम्रो हुने उनीहरुको अपेक्षा थियो । जिल्लाको धनकौलीमा सबैभन्दा बढी मात्रामा तरकारी गरिएकामा बिस्तारै अन्य ठाउँमा समेत यसको प्रभाव पर्दै जान थालेको छ । बगरमा बेमौसमी तरकारी र तरबुजाको खेतीबाट बालबच्चाको पढाइलेखाइ र घरखर्च गरेर पनि वर्षमा ५० हजारदेखि एक लाखसम्म जम्मा हुने गरेका किसानहरुले बताए । नदी किनारमा बलौटे माटो भएकाले तरबुजा, खरबुजा, लौका, करेला, काँक्रा, खुर्सानी, भान्टा, गोलभेँडालगायत विभिन्न किसिमका फलफूल तथा तरकारी खेती यहाँ लगाउने गरिएको छ ।
