आजै साँझबाट मतगणना सुरु हुने
काठमाडौँ, ३० वैशाख । स्थानीय तह सदस्य निर्वाच अन्तर्गत मतदान कार्य सकिएपछि आजै साँझबाट मतगणना सुरु हुने भएको छ । आज साँझ ५ बजेसम्म मतदान हुने भनिए पनि उक्त समयमा मतदान केन्द्रमा प्रवेश गरेका मतदातालाई मतदानमा सहभागी गराइने र मतदानकार्य सम्पन्न भइसकेपछि मुचुल्का तयार गरी पार्टी र उम्मेदवारको रोहबरमा सुरक्षितरुपमा मतपेटिका निर्वाचन अधिकृतको कार्यालयमा ढुवानी गरेर सर्वदलीय छलफललगत्तै आजै मत गणनाकार्य सुरु हुने निर्वाचन आयोगका प्रवक्ता शालिग्राम शर्मा पौडेलले जानकारी दिनुभयो ।
उहाँका अनुसार आज दिउँसो १ बजेसम्म ३७ प्रतिशत मत खसेको प्रारम्भिक जानकारी प्राप्त भएको छ । बिहान ७ बजेदेखि सुरु भएको मतदानमा छिटपुट घटनाबाहेक समग्रमा शान्तिपूर्ण र उत्साहपूर्वक मतदानकार्य भइरहेको जनाइएको छ । मुलुकभर ७५३ पालिकामध्ये कपिलवस्तुको एक पालिकाबाहेक सबै पालिकाका २१ हजार ९५५ मतदान केन्द्रमा मतदान भइरहेको छ । दोलखा, सर्लाही, रामेछाप, पर्वत, हुम्ला र बाजुराका केही मतदानस्थलमा सामान्य विवादका कारण मतदानकार्य अवरुद्ध भएकामा सञ्चालन गर्ने प्रयास भइरहेको आयोगले जनाएको छ ।
यो पनि पढ्नुहोस.. त्रिशूली। स्थानीयतह निर्वाचन–२०७९ का लागि नुवाकोटको स्थानीयतहमा मतदान सुरु भएको छ । जिल्लामा रहेको दुई नगरपालिका र १० गाउँपालिकामा कायम रहेको १३२ मतदानस्थलका २८७ मतदान केन्द्रमार्फत मत दिने व्यवस्था मिलाइएको मुख्य निर्वाचन अधिकृत उमेशप्रसाद लुइँटेलले जानकारी दिनुभयो । उहाँको अनुसार मतदाता परिचयपत्र नभएकालाई सरकारी कागजातको आधारमा समेत मत दिन पाउने निर्वाचन आयोगको निर्णयले मतदानमा सहभागी हुँदा परिचय खुल्ने सरकारी कागजात साथमा बोक्न आग्रह गरिएको छ ।मतदानको लागि एउटा मतदान केन्द्रमा मतदान अधिकृत एकजना, सहायक मतदान अधिकृत एकजना, नायब सुब्बा वा खरिदारसरहको सहायक कर्मचारी दुई र एक सहायकस्तरको कर्मचारी गरेर कम्तीमा पाँच खटाइएको छ ।
ती मतदान केन्द्रमा करिब एक हजार ५०० कर्मचारी परिचालन गरिएको छ । मतदानस्थलमा मतदान केन्द्रको सङ्ख्या र सुरक्षा संवेदनशीलताको आधारमा सुरक्षाकर्मी खटाइएको छ । प्रमुख जिल्ला अधिकारी नारायणप्रसाद रिसालको अनुसार नेपाल प्रहरी र म्यादी प्रहरी गरेर न्यूनतम ११ देखि ३३ जनासम्म एउटा मतदानस्थलमा खटाइएको छ । जिल्लामा कायम रहेको १३२ मतदानस्थलमा २८७ मतदान केन्द्र कायम गरिएको छ । त्यसमध्ये सुरक्षाको दृष्टिकोणले २९ सामान्य, ५० संवेदनशील र ४३ अतिसंवेदनशील मतदानस्थल पहिचान गरेर सुरक्षा व्यवस्था सोहीअनुसार मिलाइएको छ ।
मतदानकेन्द्र र स्थलमा म्यादीलाई साथ लिएर प्रहरीले सुरक्षा दिनेछ भने त्योभन्दा बाहिरी घेरामा सशस्त्र प्रहरी बलले गस्तीमार्फत सुरक्षा दिने र त्योभन्दा बाहिरी घेरामा नेपाली सेनाले नियमितरुपमा गस्ती खटाइएको प्रमुख जिल्ला अधिकारी रिसालले जानकारी दिनुभयो ।
उहाँले अनुशासित, मर्यादित र जिम्मेवार भएर निर्वाचनलाई सफल बनाउन आग्रह गर्नुभयो । निर्वाचनमा निर्धक्क भएर आफूले चुन्ने उम्मेदवारलाई मत दिन जिल्ला निर्वाचन अधिकारी जयप्रसाद गौतमले आग्रह गर्नुभयो । उहाँको अनुसार जिल्लामा मतदानको दुई लाख ३७ हजार ४३४ मतदाता कायम छन् । सबैभन्दा बढी विदुर नगरपालिकामा ४४ हजार १७९ मतदाता छ भने सबैभन्दा कम किस्पाङ गाउँपालिकामा १२ हजार १६१ मतदाता रहेको सम्बन्धित पालिकामा स्थापना भएको निर्वाचन अधिकृतको कार्यायले जनाएको छ ।
मतदानमार्फत जिल्लामा कायम रहेको १२ स्थानीयहबाट एक÷एक जना प्रमुख र उपप्रमुख, ८८ वडाबाट एक÷एक जना वडाध्यक्ष, त्यति नै सङ्ख्यामा महिला वडासदस्य र महिला दलित सदस्य तथा १७६ वडा खुला सदस्य चयन गर्न लागिएको छ ।ती मध्ये बेलकोटगढी नगरपालिका वडा नं १ र म्यागङ गाउँपालिका वडा नं ६ मा एक÷एकजना गरेर यसअघि दुई जना दलित महिला वडासदस्य पदमा निर्विरोध निर्वाचित भइसकेका छन् । यस्तै, दुप्चेश्वर गाउँपालिका–१ र तार्केश्वर गाउँपालिका–६ मा दलित महिला वडासदस्य पदमा उम्मेदवार नपरेपछि रिक्त छ ।जिल्लामा ४६४ पदमध्ये ४६० पदको लागि दुई हजार एक जना उम्मेदवार चुनावी प्रतिस्पर्धामा छन् ।
