सरदर मितिभन्दा अगाडि मनसुन प्रवेश
काठमाडौँ, २२ जेठ । नेपालमा यस वर्ष मनसुन सरदर मितिभन्दा अगाडि नेपालको पूर्वी भेगबाट प्रवेश गरेको जल तथा मौसम विज्ञान विभागको मौसम पूर्वानुमान महाशाखाले जनाएको छ । महाशाखाले आजै विशेष बुलेटिन निकालेर हाल यस वर्षको मनसुन प्रणाली आजका दिन नेपालको प्रदेश नं १ मा आगमन भएको जनाएको छ । नेपालको अन्य भू–भागमा भने केही दिनपछि मनसुन प्रवेश हुने महाशाखाको अनुमान छ । नेपालमा मनसुन भित्रिने सरदर मिति जुन १३ भएको विभागले जनाए पनि यसअघि विभागकै वेवसाइटमा नेपालमा सामान्यतया मनसुन १० जुनमा प्रवेश गर्ने उल्लेख गरिएको थियो ।
देशको पूर्वी भेगबाट मनसुन प्रवेश गरी क्रमशः पश्चिमतर्फ विस्तार हुन्छ । जुनदेखि सेप्टेम्बरसम्म चार महिनाको अवधिलाई दक्षिण एशियाली क्षेत्रमा मनसुनको अवधि भनिन्छ । यसै सन्दर्भमा यस वर्षको मनसुनी प्रणालीलाई मौसम पूर्वानुमान महाशाखाले निरन्तर अनुगमन गरिरहेको र सोहीअनुसार नियमितरुपमा अद्यावधिक गर्दै जाने बुलेटिनमा उल्लेख छ।
वातावरण दिवसका अवसरमा शान्ति समाजद्वारा विभिन्न जिल्लामा वृक्षरोपण
काठमाडौँ, २२ जेठ । पचासौँ विश्व वातावरण दिवसका अवसरमा मानव अधिकार तथा शान्ति समाजले एक दर्जन जिल्लामा वृक्षरोपण गरेको छ ।शान्ति समाज काठमाडौँ शाखाद्वारा ‘मेरो फोहर, मेरो जिम्मेवारी’ भन्ने मूलनारासहित जोरपाटीमा आयोजित विशेष चेतनामूलक कार्यक्रममा गोकर्णेश्वर नगरपालिकाका प्रमुख दीपक रिसालले वातावरणीय सुधारका कामलाई नगरपालिकाले प्राथमिकतामा राखेको बताउनुभयो । नगर क्षेत्रका खाली ठाउँमा यही वर्षाद्मा बिरुवा रोपिने उहाँले सुनाउनुभयो ।
कार्यक्रममा वडा नं ५ का अध्यक्ष नारायणबहादुर सुवेदी, सल्लाहकार उत्तम पुडासैनी, शान्ति समाजका महासचिव रामकृष्ण बराल, काठमाडाँै शाखा सभापति भगवान पुडासैनी लगायतले वातावरण संरक्षणका लागि हरियाली प्रवद्र्धन गरिनुपर्नेमा जोड दिनुभयो । नगर क्षेत्रका खाली स्थानमा बिरुवा रोप्ने अभियानमा साथ दिने उहाँहरुको प्रतिबद्धता थियो । सो अवसरमा जोरपाटीस्थित नयाँबस्ती युवा क्लब परिसरअघि वृक्षरोपण गरिएको छ । ओखर, तेजपत्तालगायत जातका करिब ३० बिरुवा त्यस क्षेत्रमा रोपिएको छ । बिरुवालाई नहुर्किएसम्म जिल्ला शाखा काठमाडौँले हेरिरहने जनाइएको छ ।
यसैगरी समाजका जिल्ला शाखाको आयोजनामा सङ्खुवासभाको खाँदबारी, सुनसरीको धरान, रुपन्देहीको बुटवल, दाङको तुलसीपुर, चितवनको भरतपुर, मोरङको विराटनगर, महोत्तरीको जलेश्वर, पाल्पाको तानसेन, पर्साको वीरगञ्ज, काठमाडौँको गोठाटारमा पनि वृक्षरोपण कार्यक्रम सम्पन्न भएका छन् । यसैगरी विभिन्न निकायसँगको सहकार्यमा सुर्खेत र ललितपुर शाखाले पनि वृक्षरोपण कार्यक्रम गरेका थिए । वातावरण संरक्षणको क्षेत्रमा सकारात्मक कदम चाल्ने आवश्यकताप्रति विश्वव्यापी रुपमा जनचेतना फैलाउँदै संयुक्त राष्ट्रसङ्घको आह्वानमा ५ जुनलाई विश्व वातावरण दिवसका रुपमा मनाइन्छ ।
