बिदेशी सपना प्याक गरेर स्वदेशमै सुन फलाउदै बिनोद श्रेष्ठ
जीवनप्रसाद राई/कजेनी, ईलाम । साथीहरुको संगतले कुनैबेला बिदेशिने रहरमा लागेका सुर्योदय नगरपालिका ८ का बिनोद श्रेष्ठ अहिले चलानी जातको स्कुस खेतीमा लागेका छन । उनले ४० रोपनी जमिन बार्षिक २ लाख भाडा तिर्ने शर्तमा लिई स्कुसको खेतीमा लागेका हुन । उनको बार्षिक खर्च बाँसमा ५ लाख, कामदरमा ७ लाख गरि १२ लाख रुपियाँ हुने गरेको छ । बर्षमा उनी १ लाख २० हजार किलो स्कुस बेच्ने गर्दछन । आफ्नो सम्पुर्ण खर्च कटाएर कम्तिमा पनि बार्षिक रुपमा २० लाख रुपियाँ कमाउने गर्दछन ।
उनी आफ्नो स्कुसलाई भारतको सीमा सम्म आफै पुर्याउने गर्दछन । उनले अन्य धेरै कृषकहरुको स्कुसलाई समेत सीमाना सम्म पुर्याउन काम गर्दछन । उनका अनुसार पशुपतिनगर बाट दैनिक रुपमा ३८ लाख बराबरको स्कुस भारतमा निर्यात हुने गर्दछ । निर्यातमा समस्याहरु रहेका छन । नेपाल सरकारले केही मात्रामा सहयोग गरे सहज हुने उनी बताउँछन । बिदेशी बजारलाई बिस्तार गर्नका साथै स्वादेशमा स्कुसबाट बनाउन सकिने प्रडक्टहरु बनाउन सकिएमा स्कुसको उत्पादन धेरै मात्रामा बढ्ने हुन्छ ।
उनको भनाईमा चलानी जातको स्कुस भदौ महिनामा रोपि सक्नु पर्दछ । पातालो गरेर रोपिने यो स्कुसको अर्को बर्ष बीच बीचमा अर्को स्कुसको बीउ रोप्नु पर्दछ । यसको मुन्टा टिप्न मिल्दैन भने भुईतिर आउने मुन्टालाई टिप्नुपर्दछ । बाक्लो गरि आएको पातले यसको फलमा असर गर्ने हुनाले यसलाई समय समयमा टिपेर फाल्नु पर्दछ । यसरी टिपेर फालिएको पातलाई गाई, भैसी, बाख्रा तथा बंगुर सबैलाई घाँस तथा दानाको रुपमा काममा आउने गर्दछ ।
आगामी दिनमा उनी थप आफ्नो योजनालाई बिस्तार गर्दै १ सय रोपनीमा स्कुस खेती गरेर बार्षिक रुपमा ७० देखि १ करोड सम्म आम्दानी गर्ने लक्ष्य रहेको छ । उनी बिदेशमा भन्दा स्वादेशमै पसिना बगाउन पाएकोमा निकै खुसी देखिन्छन ।
सुर्योदय नगरपालिकामा हाल स्कुस ३ वटा वडामा खेती भईरहेको छ । स्कुस खेतीमा संलग्न कृषक संख्या अनुमानित १ हजार ५ सय जना रहेका छन । हाल सुर्योदय नगरपालिका क्षेत्रमा मात्रै दैनिक रुपमा २ लाख किलो स्कुसको उत्पादन हुने र भारत निर्यात गरेर बार्षिक रुपमा झण्डै ७० करोड रकम भित्रिने गरेको छ ।
