भीमनारायण गोल्डकपको १५ औं संस्करण बैशाखमा हुने
धनकुटा,१३ चैत । भीमनारायण गोल्डकपको १५ औं संस्करण प्रतियोगिता २०८० साल बैशाख १७ देखि २३ गतेसम्म सञ्चालन गरिने भएको छ । गोल्डकप आयोजक समितिको बैठकले बैशाख १७ देखि २३ गतेसम्म प्रतियोगिता सञ्चालन गर्ने निर्णय गरेको हो ।
२०६३ सालयता बर्षेनी गोल्डकप सञ्चालन भइरहेपनि २०७६ यता प्रतियोगिता सञ्चालन हुन सकेको थिएन । कोरोना महामारीका कारण स्थगन भएको बताइएको प्रतियोगिता तीन बर्षपछि पुनः सञ्चालन गर्न लागिएको हो । आयोजक समितिले प्रतियोगिताको पुरस्कार राशि पनि बढाउँने निर्णय गरेको छ । यस पटकको विजेताले ७ लाख र उप विजेताले ३ लाख ५० हजार पाउँने मुल आयोजक समितिका संयोजक शम्भु प्रधानले जानकारी दिए ।
‘पहिले विजेतालाई ५ लाख र उपविजेतालाई २ लाख ५० हजार दिएका थियौं,’ संयोजक प्रधानले भने, ‘प्रतियोगितामा थप आकर्षण बढाउँन यसपटक पुरस्कार राशि बढाएर ७ लाख पुर्याएका छौं ।’प्रतियोगिता सञ्चालनका लागि नौं वटा उपसमिति पनि निर्माण गरिएको छ ।
शम्भु प्रधानको संयोजकत्वमा आर्थिक संकलन, गोविन्द राईको संयोजकत्वमा फिल्ड व्यवस्थापन, विनय राईको संयोजकत्वमा मञ्च तथा अतिथि स्वागत, विदुर खवासको संयोजकत्वमा प्रचार प्रसार तथा मिडिया व्यवस्थापन र रुपेश श्रेष्ठको संयोजकत्वमा स्वयंसेवक तथा गेट व्यवस्थापन उपसमिति निर्माण गरिएको छ ।
त्यस्तै, नविन किशोर शाक्यको संयोजकत्वमा सुरक्षा व्यवस्थापन, शुक्र लिम्बुको संयोजकत्वमा स्वास्थ्य उपचार, रामबहादुर श्रेष्ठको संयोजकत्वमा कार्यक्रम तयारी, शिशिर श्रेष्ठको संयोजकत्वमा सचिवालय सञ्चालन र सुमन श्रेष्ठको संयोजकत्वमा टिम व्यवस्थापन उपसमिति निर्माण गरेर तयारी थालिएको प्रचार प्रसार तथा मिडिया व्यवस्थापन समितीका संयोजक विदुर खवासले जानकारी दिनु भयो ।
