‘दमाई महाराज’मा यसरी पेश भए प्रकास सपूत
काठमाडौ । अन्ततः प्रकास सपूतको गीति भिडियो ‘दमाई महाराज’ सार्वजनिक भएको छ । पूर्ववत् गीति भिडियोमा झै यसपाली पनि उनले फरक सामाजिक मुद्दालाई मियोमा राखेका छन् । र, उही कथानक शैलीमा मीठो भाका हालेर पेश गरेका छन् ।
‘दमाई माहाराज’मा प्रकासले छुवाछुत वा नश्लीय विभेद विरुद्धको कुरा गरेका छन् । दमाईको गर्भमा जन्मिएको एउटा अबोध वालक मन्दिरमा प्रवेश गर्दा ‘अछुतो’ भयो भन्ने आडम्बरमाथि उनले कटाक्ष गरेका छन् । जन्मको आधारमा कोही सानो, ठूलो हुँदैन, धर्मग्रन्थले कसैमाथि विभेद गर्नु भनेको छैन, मान्छे जन्मले होइन कर्मले कोही श्रेष्ठ वा कोही निच हुन्छ भन्ने सन्देश पस्किएका छन् ।
हरेक पटक पृथक शैली पस्कने प्रकासको गीत यसपाली भजन शैलीमा छ । गीत प्रकास स्वयमले रचेका हुन् । संगीत पनि उनकै हो । आवाजमा प्रकासलाई शान्तिश्री परियारले साथ दिएकी छिन् । सुदिप सागरले संगीत संयोजन गरेका छन् ।
धार्मिक सप्ताहको पृष्टभूमी बनाएर प्रकासले गीतको म्युजिक भिडियो बनाएका छन् ।
‘दमाई महाराज’को म्युजिक भिडियोको कथा रचना र निर्देशन प्रकास सपूतले गरेका हुन् । भिडियोमा प्रकाससँगै अन्जली अधिकारी, गीता ढुंगाना, गरिमा शर्मा, प्रभात ठाकुरी देख्न सकिन्छ । भिडियोलाई मीलन कृष्ण महर्जनले र दिनेश पराजुलीले खिचेका हुन् । यो गीति भिडियो उनले आफ्नै युट्युब च्यानलबाट सार्वजनिक गरेका छन् ।
