सारुकको निधनबारे मलिनाले लेखिन्–‘भगवान् पापीलाई आफ्नै तरिकाले ठिक पार्नुहोस्’
असारको २१ गते आफ्नै घरमा आत्महत्या गरेका नायक सारुक ताम्राकारको निधनको बारेमा केही दिन अगाडिसम्म सामाजिक संजाल तातिएको थियो । सारुकको आत्महत्याको बिषयमा विभिन्न खालका समाचारहरु सार्वजनिक भए । तर, अहिले न त यो बिषयमा फिल्मीकर्मीले नै बोलेका छन् न त सरोकारवालाहरुले नै ।
कलाकारहरु मौन बसेको अवस्थामा प्रहरीले पनि यो घटनालाई गम्भिर रुपमा छानबिन गरेको छैन । कतैबाट पनि किटानी जाहेरी नपरेपछि प्रहरीले यो घटनालाई गम्भिर रुपमा लिन नसकेको हो ।
तर, सारुकको नजिककी साथी मलिना जोशीले भने बारम्बार आवाज उठाइरहेकी छिन् । प्रहरीमा कतैबाट पनि किटानी जाहेरी नपरेपछि मलिनाले सामाजिक संजालमार्फत आफ्नै तरिकाले पापीलाई ठिक पार्न भगवान्सँग प्रार्थना गरेकी छिन् ।
उनले लेखेकी छिन्–‘उ भित्रबाट कति सुन्दर थियो भन्नका लागि मसँग कुनै शब्द छैन । उसले जसलाई पनि भेटेको थियो, ती व्यक्तिहरुसँग उसका लागि भन्नका लागि केवल राम्रा कुराहरु मात्र छन् । उ त गैहाल्यो, तर कृपया भगवान् पापीलाई आफ्नै तरिकाले ठिक पार्नुहोस् । उसलाई त्यो स्वर्ग प्रदान गर्नुहोस्, जसका लागि उ हकदार छ । माता पिताको अत्याधि पीडाको चित्कारबाट उ अझै पनि बाहिर निस्कन सकेको छैन ।’
मलिनाले सारुकका पिता सानु ताम्राकारले कसैलाई पनि रुन नदिन सान्त्वना दिने कोशिश गरिरहेको समेत लेखेकी छिन् । उनले, सारुक एक अद्भुत माता पिताको हेरचाहामा राम्रोसँग हुर्किएको छोरा रहेको समेत बताएकी छिन् ।
