कोशी प्रदेशमा एमालेले उपसभामुखको राजीनामा नगराउने
काठमाडौं, १६ साउन । कोशी प्रदेशमा नेकपा (एमाले) ले अहिले नै उपसभामुखको राजीनामा नगराउने भएको छ । सरकार गठनका लागि बहुमत पुर्याउन सत्ता गठबन्धनले सभामुखको राजीनामा गराउने तयारी गरेपनि एमालेले उपसभामुखको राजीनामा नगराउने बताएको हो ।
आज (मंगलबार) कोशी प्रदेशका काम चलाउ मुख्यमन्त्रीसमेत रहेका हिक्मत कार्कीले उपसभामुखको राजीनामा गराउन आफूबाट ‘मर्यादाहीन काम नहुने’ बताए । ‘हामी उपसभामुखलाई राजीनामा गराउने मर्यादाहीन काम गर्दैैनौं,’– सञ्चारकर्मीहरु संगको कुराकानीमा उनले भने ।
उनले एमाले र कांग्रेस मिलेर निकास दिनुपर्ने प्रस्ताव लगेपनि तत्काल एमालेसँग मिलेर समस्याको निकास दिने बाटोमा कांग्रेस नरहेको बताए ।
