खाँण र रायमाझीको कैफियत प्रतिवेदन झिकाउन उच्च अदालतको आदेश
काठमाडौं । नक्कली भुटानी शरणार्थी प्रकरणमा काठमाडौं जिल्ला अदालतको आदेशविरुद्ध बालकृष्ण खाँण र टोपबहादुर रायमाझी उच्च अदालत पाटन गएका छन् ।आफूहरुलाई पूर्पक्षका लागि थुनामा राख्ने आदेश गलत भएको भन्दै काठमाडौं जिल्ला अदालतको आदेशविरुद्ध खाँण र रायमाझी उच्च अदालत पाटन पुगेका छन् । उनीहरु एकैसाथ भने अदालत गएका होइनन् ।
यही साउन ११ गते रायमाझीले उच्चमा निवेदन दिएका थिए भने खाँणले १२ गते निवेदन दिएका थिए । उनीहरु दुवैले मुद्दाको विषयवस्तु, प्रमाणको विवेचना नगरी आफूहरुलाई थुनामा राखेको भन्दै उनीहरुले थुनामुक्त गर्ने आदेश माग गरेका छन् ।
टोपबहादुरको निवेदनमा सुनुवाइ गर्दै १२ गते नै न्यायाधीश महेन्द्रनाथ उपाध्यायको इजलासले कैफियत प्रतिवेदन झिकाउने आदेश गरेको छ भने खाँणको निवेदनमा सुनुवाइ गर्दै न्यायाधीश हरिप्रसाद पौडेलेका इजलासले १४ साउनमा कैफियत प्रतिवेदन झिकाउने आदेश गरेको हो ।
सम्बन्धित व्यक्तिलाई लागेको अभियोग र त्यसका आधारमा आदेश गरिएको आधारसहित तयार पारिएको विवरणलाई कैफियत प्रतिवेदन भनिन्छ । जिल्ला अदालतले प्रतिवेदन पठाएपछि उच्च अदालतले सुनुवाइसहित जिल्लाको आदेशको परीक्षण गरी थप आदेश दिनेछ।
