भाइरल हुन धेरै पानी पिउँदा अस्पताल भर्ना
काठमाडौं । सामाजिक सञ्जालमा भाइरल हुने रहरमा मानिसहरु प्रायः यस्तो काम गर्छन् जसलाई पछि पछुताउनु पर्छ । यस्तै एउटा घटना सार्वजनिक भएको छ, जसमा एक टिकटकरले अनलाइन फिटनेस च्यालेन्जका क्रममा यति पानी पिइन् कि उनलाई अस्पताल भर्ना गर्नु परेको छ । अस्पतालमा भर्ना भएलगत्तै टिकटकरले सामाजिक सञ्जालमा आफ्नो तस्बिर पोस्ट गर्दै घटनाबारे जानकारी दिएकी छिन् ।
न्यूयोर्क पोस्टका अनुसार टिकटक इन्फ्लुएन्सर मिशेल फेयरबर्न क्यानडामा बस्छिन्। उनले सामाजिक सञ्जालमा प्रचलित ७५ हार्ड च्यालेन्जलाई स्वीकार गरिन् र यसलाई पछ्याउन थालिन्।
यस चुनौतीमा बिहान सबेरै उठ्ने, दैनिक व्यायाम गर्ने, बाहिरको खाना नखाने, रक्सी नखाने, दैनिक १० मिनेट किताब पढ्ने जस्ता ७५ दिनसम्म दिनचर्या पालना गर्नुपर्ने हुन्छ ।
यो चुनौती स्वीकार गर्नेले दैनिक पिउने पानीको मात्रा बढाउनुपर्छ र सामाजिक सञ्जालमा दैनिक आफ्नो फोटो सेयर गर्नुपर्छ । मिशेल फेयरबर्नले ठ्याक्कै त्यस्तै गरिरहेकी थिइन्।
मिशेलले लगातार १२ दिनसम्म ४ लिटर पानी पिइरहेकी थिइन् । बाह्र दिनपछि टिकटकमा आफ्नो एउटा भिडियो सेयर गर्दै उनले धेरै पानी पिउँदा आफ्नो स्वास्थ्य बिग्रँदै गएको महसुस भएको बताइन् ।
भिडियोमा मिशेलले भनिन्, ‘मलाई पटक्कै राम्रो लागेको छैन । धेरै पटक राती सुतेपछि उठेर बाथरुम जानुपर्थ्यो । मेरो भोक रोकियो र म कमजोरी महसुस गर्न थाले। मैले दिनको धेरै घण्टा शौचालयमा बिताउनु पर्थ्यो।
टिकटकरले थपिन्, ‘अवस्था बिग्रिएपछि डाक्टरकहाँ पुगें । उहाँकै आदेशमा धेरै किसिमका परिक्षण गरियो । परीक्षणको रिपोर्ट आएपछि डाक्टरले मलाई सोडियमको कमी नामको रोग लागेको बताए । लगातार ४ लिटर पानी पिउँदा यस्तो भएको हो । डाक्टरले केही दिनसम्म दैनिक आधा लिटरभन्दा कम पानी पिउन सल्लाह दिए । डाक्टरले मलाई सोडियमको कमी वा हाइपोनेट्रेमियाको समयमै उपचार गरिएन भने यसले ज्यानसमेत जान सक्ने बताए।’
उनले थपिन्, ‘मलाई सोडियमको कमीका कारण अस्पताल भर्ना गर्नुपरेको थियो । मेरो शरीरमा सोडियमको कमी छ, जसलाई अब औषधिले बढाउनेछ । म विश्वास गर्न सक्दिन कि यो भइरहेको छ, तर म ७५ हार्ड च्यालेन्ज छोड्न गइरहेको छैन। तर, चिकित्सकको सल्लाहअनुसार अहिले आधा लिटरभन्दा कम पानी पिउने छु ।
यो फिटनेस च्यालेन्ज २०१९ मा पोडकास्टर र सप्लिमेन्ट कम्पनीका सीईओ एन्डी फ्रिसेलाले सुरु गरेका थिए। उनले यसलाई मानव दिमागका लागि ‘आइरनम्यान’ भनेका छन् । तर, उनले यो फिटनेस कार्यक्रम सुरु गर्नुअघि डाक्टरसँग सल्लाह लिनुपर्ने पनि बताएका छन् । यदि डाक्टरले सिफारिस गर्दैन भने यसलाई सुरु नगर्नुहोस्।
