उपाधि जितेपछि जब मेसीले कप्तानको ‘ब्यान्ड’ पूर्वकप्ताको पाखुरामा लगाइदिए…
मियामी । अर्जेन्टिनी स्टार लियोनल मेसीको उत्कृष्ट प्रदर्शनसँगै अमेरिकी क्लब इन्टर मियामीले लिग्स कप फुटबल प्रतियोगिताको उपाधि चुम्यो । इन्टर मियामीले जितेको यो पहिलो उपाधि हो । मेसी भर्खरैमात्र इन्टर मियामीमा आबद्ध भएका हुन् ।
क्लबलाई ऐतिहासिक उपाधि चुमाउन मेसीले महत्वपूर्ण भूमिका निर्वाह गरे । इन्टर मियामी आबद्ध भएयता आफूले खेलेका सातवटा खेलमा मेसीले १० गोल गरिसकेका छन् । मेसीले खेलेको सातवटै खेलमा इन्टर मियामी विजयी भएको छ ।
लिग्स कपको फाइनलमा इन्टर मियामीले न्यासभिल एससीलाई पेनाल्टी सुटआउटमा १०(९ गोलले हराएको थियो । फाइनल खेलमा समेत मेसीले उत्कृष्ट प्रदर्शनसहित गोल पनि गरेका थिए । उपाधि जितेपछि इन्टर मियामीका खेलाडी र पदाधिकारी खुसीयाली मनाउन ब्यस्त थिए । खेलमा उत्कृष्ट प्रदर्शन गरेर प्रसंशा बटुलेका मेसीले खुसीयाली मनाउने क्रममा पनि थुप्रै खेलप्रेमीको मन जित्न भ्याए । यतिबेला विश्वभरका असंख्य फुटबलप्रेमीले इन्टर मियामीले लिग्स कपको खुसीयाली मनाउँदाको भिडियो र तस्बिर सामाजिक सञ्जालमा सेयर गरिरहेका छन् ।
खासमा अहिले इन्टर मियामीका कप्तान पनि मेसी नै हुन् । उनले एक महिनाअघि आजैको दिन (जुलाई २१) मा इन्टर मियामीमा ‘डेब्यू’ गरेका थिए । तर, उनीभन्दा अगाडि इन्टर मियामीको कप्तान थिए, डीआन्द्रे एड्लिन । उनले थुप्रै खेलमा इन्टर मियामीको कप्तानी गरेका थिए ।
त्यसैले इन्टर मियामीले लिग्स कपको रुपमा पहिलो उपाधि जितेपछि मेसीले आफूले लगाएको कप्तानको ‘ब्यान्ड’ निवर्तमान कप्तान एड्लिनलाई दिए । वास्तबमा मेसी एड्लिनप्रति सम्मान ब्यक्त गर्न चाहन्थे । सातपटकका बेलन डीओर विजेता मेसीको यो शालिन ब्यवहारबाट रंगशालामा उपस्थित हजारौं समर्थक भावुक बने ।
वास्तबमा मेसीले मैदानमा खेल भावनाको उत्कृष्ट उदाहरण प्रस्तुत गरेका थिए । मेसीले कप्तानको ‘ब्यान्ड’ आफ्नो हातबाट फुकालेर निवर्तमान कप्तान एड्लिनलाई लगाइदिन खोज्दा उनले अप्ठ्यारो मानेका थिए । सुरुमा एड्लिनले कप्तानको ब्यान्ड लगाउन मानेका थिएनन् । तर, मेसीले उनको पाखुरामा उक्त ब्यान्ड लगाएरै छाडे । त्यसपछि लिग्स कपको ट्रफी उचाल्ने क्रममा पनि मेसीले उक्त ट्रफी निवर्तमान कप्तान एड्लिनलाई हस्तान्तरण गरेका थिए ।
एड्लिन अमेरिकी राष्ट्रिय टोलीका सदस्य पनि हुन् । ३० वर्षीय एड्लिन सन् २०२२ मा इन्टर मियामीसँग जोडिएका हुन् । त्यसअघि उनी टर्किस क्लब गालातसारेबाट खेल्थे । मेसी आउनुअघि एड्लिन नै इन्टर मियामीका कप्तान थिए । उनले २० वटा खेलमा इन्टर मियामीको कप्तानी गरेका थिए ।
