भारतीय अभिनेता गोविन्दाले रौतहटमा मनाए नारी दिवस
जनकपुरधाम । भारतीय चर्चित अभिनेता गोविन्दाले रौतहटमा नारी दिवस मनाएका छन् ।
रौतहटको मौलापुरमा आज सुरु भएको मधानी महोत्सवमा सहभागी हुन आएका अभिनेता गोविन्दाले नेपालमै नारी दिवस मनाएका हुन् ।
अभिनेता गोविन्दा, आम जनता पार्टी (आजपा)का अध्यक्ष प्रभु साह, मौलापुरकी मेयर रीना साहले ‘अन्तर्राष्ट्रिय नारी दिवसको तुल’ (बैलुन) आकाशमा उडाए ।
नेपालमा नारी दिवस मनाउन पाएकोमा खुशी व्यक्त गर्दै अभिनेता गोविन्दाले नारीलाई अधिकार सम्पन्न बनाउनुपर्नेमा जोड दिए ।
उनले मेयर रीनाले गरेको विकास देखेर खुशी लागेको पनि सुनाए ।
आजपा अध्यक्ष साहले राज्यको हरेक तह र निकायमा महिलाको ५१ प्रतिशत अधिकार सुनिश्चित होस् भन्ने उद्घोषका साथ आम महिला मोर्चाले मधानी महोत्सवमै ‘अन्तर्राष्ट्रिय नारी दिवसको तुल’ आकाशमा उडाएको बताए ।
