पाख्रीवासमा आजबाट तीन दिने बृहत नि:शुल्क स्वास्थ्य शिविर शुरु
धनकुटा । धनकुटाको पाख्रीवासमा आजबाट बृहत नि:शुल्क स्वास्थ्य शिविर शुरु भएको छ । नगरका आम नागरिकको स्वास्थ्य सेवालाई मध्यनजर गर्दै पाख्रीवास नगरपालिकाको आयोजमा तथा टच हेल्पिङ हेल्थ पोलिक्लिनिक संखुवासभाको प्राविधिक सहयोगमा स्वास्थ्य शिविर सञ्चालन भईरहेको हो ।
शिविरको उद्घाटन पाख्रीवास ९ का वडाध्यक्ष तथा नगरका सामाजिक विकास समितीका संयोजक सम्झना आलेको अध्यक्षतामा सञ्चालित कार्यक्रमको नगर प्रमुख ज्ञान वहादुर गुरुङ र हेल्पिङ हेण्स् हेल्थ एजुकेशन अमेरिकाका अन्तराष्ट्रिय प्रेसिडेन्ट तथा फाउण्डर नारायण श्रेष्ठले गरेका छन् ।
शिविर उद्घाटन कार्यक्रममा बोल्दै नगर प्रमुख गुरुङले सम्पूर्ण नागरिकलाई स्वास्थ्य सेवा लिन आग्रह गर्नुभयो । त्यस्तै फाउण्डर श्रेष्ठले आगामी दिनमा पनि यहाका नागरिकहरुलाई स्वास्थ्य सेवाका लागि सहयोग गर्ने बताउनु भयो ।
कार्यक्रममा संविधानसभा सदस्य मनोहर नारायण श्रेष्ठ,नगर उपप्रमुख नम्रता गौतम लगायतले मन्तव्य राखेका थिए । कार्यक्रममा नगरका सम्पूर्ण वडाका वडाध्यक्ष, राजनीतिक दलका प्रमुख एवम् प्रतिनिधि सहित विभिन्न संघ संस्थाका प्रमुखको उपस्थिति रहेको थियो ।
स्वागत मन्तव्य नगरका सामाजिक विकास समिती सदस्य बसन्तराज निरौलाले राख्नुभएको थियो भने सञ्चालन गोकुल घिमिरेले गर्नुभएको थियो ।
शिविर जेष्ठ ६ गते सम्म सञ्चालन हुनेछ ।
