धनकुटामा सुमो दुर्घटना,छ जना घाइते(नामावली सहित)
धनकुटा,चैत ११ । धनकुटामा सुमो दुर्घटना भएको छ ।
जिल्लाको सांगुरीगढी गाउंपालिका ६ स्थित कोशी लोकमार्गको कार्कीछापमा आज दिउंसो २:३० बजे धरानबाट संखुवासभा तर्फ जांदै गरेको प्रदेश नं १-०२-००१ ज ४०६६ नम्बरको सुमो दुर्घटना भएको हो ।
दुर्घटनामा ६ जना घाइते भएको र उनीहरुको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको साथै अवस्था सामान्य रहेको जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले धनकुटा खबरलाई जानकारी दिए ।
दुर्घटनामा घाइते हुनेहरुमा संखुवासभाको मकालु गाउंपालिका ४ का ४५ बर्षिय सुमित्रा तामांग,३५ बर्षिय निर्मला राई,२४ बर्षिय बिकेन्द्र राई,१८ बर्षिय स्वस्तिका राई तथा धनकुटाको महालक्ष्मी नगरपालिका ३ का ६६ बर्षिय मैयां थापा र उहांकी छोरी १२ बर्षिय आयुशा थापा रहेका छन् ।
दुर्घटना गाडीको अगाडिको टायर पड्किएर भएको र गाडीमा सवार १३ जना मध्ये ७ जना सकुशल रहेको प्रहरीले जनाएको छ ।
सवारी चालक सुनसरीको धरान उपमहानगरपालिका १५ का ३४ बर्षिय सुमन लिम्बुलाई इलाका प्रहरी कार्यालय भेडेटारले नियन्त्रणमा लिएको छ ।
