धनकुटामा वृहत मोटरसाइकल र्याली निकालेर एमालेले गर्यो गणतन्त्रको पक्षमा शक्ति प्रदर्शन
धनकुटा,१८ चैत । नेकपा एमाले धनकुटाले आज धनकुटा बजारमा वृहत मोटरसाइकल र्याली प्रदर्शन गरेको छ । संघीय लोकतान्त्रिक गणतन्त्र, यसबाट प्राप्त उपलब्धी र संविधानको रक्षाका लागि एमालेले वृहत जनजागरण मोटरसाइकल र्याली प्रदर्शन गरेको हो ।
सयौँ मोटरसाइकलको ताँतीसहित बसपार्कबाट सुरु भएको र्यालीले धनकुटा बजार परिक्रमा गरेको छ । र्याली बसपार्कबाट डाँडागाउँ, हुलाकटोल, वीचबजार, भीमनारायण चोक, माथ्लो कोप्चे, तल्लो कोप्चे हुँदै मदनचोक आएर सभामा परिणत भएको थियो ।
र्यालीमा सहभागीहरूले ‘गणतन्त्र जिन्दावाद, प्रतिगमन मुर्दावाद, हत्या हिंसा लुटपाट अन्त्य गर, जन्मसिद्ध श्रेष्ठता स्वीकार्य छैन, नेकपा एमाले जिन्दावाद’ लगायत नारा लगाउँदै बजार परिक्रमा गरेका छन् । जिल्लाका सातवटै पालिकाबाट भेला भएका एक हजार भन्दा बढी मोटरसाइकलसहितको र्यालीले बजार परिक्रमा गरेको एमाले धनकुटाका प्रचार विभाग प्रमुख रविन कटेलले जानकारी दिए ।
यसैबीच, र्याली पश्चात आयोजित सभालाई सम्बोधन गर्दै एमाले धनकुटा अध्यक्ष शिव आङ्लाले वृहत मोटरसाइकल र्यालीले धनकुटामा एमाले र गणतन्त्रको पक्षमा रहेको जनलहरलाई छर्लङ्ग पारेको उल्लेख गरे ।
एमाले जिल्ला सचिव पर्शुराम नेपालले जनता गणतन्त्रको पक्षमा रहेको भन्दै केही प्रतिगामीहरूले हिंसात्मक गतिविधि गर्दैमा राजतन्त्र फर्किने कुनै सम्भावना नरहेको दावी गरे । गणतन्त्र विरोधी प्रतिगामीहरू सल्बलाउन थालेको भन्दै एमालेले त्यसका विरुद्ध धनकुटासहित देशभर प्रदर्शन गरेको छ ।
