दुई किशोरी २ दिनदेखि बेपत्ता
नुवाकोट, असार १७ । नुवाकोटको पञ्चकन्या गाउँपालिका वडा नम्बर ५ भद्रुटारस्थित दुई किशोरी विगत दुई दिनदेखि बेपत्ता भएका छन् । बेपत्ता हुनेमा भद्रुटारस्थित भेडाबारीकी १४ वर्षीया रजिना फुयाल र १७ वर्षीया बिनिता विक रहेका छन् ।
उनीहरू असार १५ गते घरबाट नजिकैको रोपाईं मेलामा गीत सुन्न भन्दै निस्किएका थिए । तर त्यसयता उनीहरू सम्पर्कविहीन भएका हुन् । हराएको दुई दिन बितिसक्दा पनि दुवै किशोरीको अवस्थाबारे अहिलेसम्म कुनै जानकारी प्राप्त हुन सकेको छैन ।
मेलमिलाप केन्द्र भद्रुटारका संयोजक मनोहर भट्टराईका अनुसार आफन्त तथा अन्य सम्पर्क माध्यममार्फत खोजतलास गर्दा पनि उनीहरूको अत्तोपत्तो लागेको छैन ।
परिवार, स्थानीयवासी र प्रहरीको सहयोगमा खोजी कार्य जारी रहेको जनाइएको छ ।
