बदन भण्डारीमाथि आक्रमणमा संलग्नलाई कारबाही गर्न रास्वपाको माग
काठमाडौ । राष्ट्रिय स्वतन्त्र पार्टी(रास्वपा)को केन्द्रीय सार्वजनिक मामिला विभागका सचिव बदन भण्डारीमाथि काठमाडौंको कपनमा आक्रमण भएको छ ।
बुधबार राति पौने ९ बजे कपनस्थित प्रगति चोकमा उनीमाथि नम्बर प्लेट छोपेर मोटरसाइकलमा आएका तीन जनाको समूहले आक्रमण गरेको हो ।
रड प्रहारबाट भण्डारीको टाउकोमा १० टाँका लगाउनु पर्ने गरी गहिरो चोट लागेको छ । शरीरभर निलडाम रहेका रास्वपाले जनाएको छ । ज्यान लिने उद्देश्यसहित आक्रमण गरिएको भन्दै रास्वपाले घटनाको घोर निन्दा गरेको छ ।
‘यस निन्दनीय घटनाको तत्काल विश्वसनीय छानबिन तथा दोषीलाई पक्राउ र कानूनी कारबाही गर्न जोडदार माग गर्दछौँ,’ रास्वपाको केन्द्रीय र्याटका संयोजक प्रदीप तिमल्सेना (साजन)ले विज्ञप्ति जारी गरेर भनेका छन्, ‘साथै, भविष्यमा यस्ता घटना दोहोरिन नदिनका लागि सुरक्षा व्यवस्था सुदृढ गर्न पनि सरकारको ध्यानाकर्षण गराउँछौँ ।’
