जेनजी प्रदर्शन : प्रदर्शनकारीको मृत्युपछि सिभिल अस्पताल क्षेत्र तनावग्रस्त
काठमाडौं । जेनजीको प्रदर्शनका क्रममा प्रहरीको गोली लागि घाइते भएका एकजनाको मृत्यु भएपछि युवाहरु आक्रोशित भएका छन् ।
आक्रोशित जेनजी युवाहरुले नयाँ वानेश्वरको सिभिल अस्पतालमा आक्रमण गरेका छन् । मृत्यु भएका भनिएका व्यक्तिको बारेमा थप जानकारी लिनका लागि सुनौलो नेपालले सम्पर्क गर्दा अस्पतालको फोन सम्पर्कमा आएका कर्मचारीले भनिन्, ‘अहिले कुनै सूचना दिन सक्ने अवस्था छैन । अस्पतालको झ्यालका सिसाहरु फोडिएका छन् । हाम्रो नै ज्यान जोगाउन गाह्रो भयो, म अहिले भागेँ ।’
प्रदर्शनकारीले निषेधित क्षेत्र तोड्दै संसद भवन छिरेपछि कर्फ्यू लगाइएको थियो ।
कर्फ्यूका बाबजुद पनि युवाहरु उर्लिएपछि प्रहरीले गोली चलाएको हो । गोली लागि घाइते भएका एक जनाको सिभिल अस्पतालमा मृत्यु भएको छ । अन्य घाइतेहरुको उपचार भइरहेको छ ।
