साँगुरीगढी–९ बेस्राङमा स्थानीयको सक्रिय जनश्रमदानद्वारा सडक सञ्चालन
हिराराज राई,धनकुटा । धनकुटा जिल्लाको साँगुरीगढी गाउँपालिका वडा नं. ९ स्थित आहाले, कटहरे, बेस्राङ र खर्वनी सडक स्थानीयहरूको सक्रिय जनश्रमदान द्वारा सञ्चालनमा आएको छ।
गत असोज १८ र १९ गतेको अविरल वर्षापछि गएको पहिरोले सडकका विभिन्न स्थान अवरुद्ध बनेका थिए। सडक अवरुद्ध भएपछि आवागमन पूर्णरूपमा ठप्प भएको थियो।
सडक पुनः सञ्चालनका लागि बेस्राङ र खर्वनीका स्थानीय बासिन्दाहरूले जनश्रमदानमार्फत सडक सफा गरेर यातायात सञ्चालनमा ल्याएका हुन्।
यसअघि गाउँपालिकाबाट कार्तिक १ गते पठाइएको जेसिबीले सडक अवरुद्ध पूर्ण रूपमा नखोली फर्किएपछि स्थानीयहरू आफै अग्रसर भएर सडक खुलाउन लागी परेका थिए।
स्थानीयको सक्रिय सहभागितामा सडक सञ्चालनमा आएपछि अहिले साना सवारी साधन सहज रूपमा गुड्न थालेका छन्। सडक खुल्नासाथ कृषिजन्य वस्तु बजारसम्म पु-याउन र खाद्यान्न सामग्री ल्याउन सहज भएको स्थानीयवासीहरूले बताएका छन्।
