‘हतियार फिर्ता नगरे अपरेशन चलाउँछौं’ : गृहमन्त्री अर्याल
काठमाडौ । गृहमन्त्री ओमप्रकाश अर्यालले फरार कैदीबन्दी र जेनजी आन्दोलनका क्रममा लुटिएका हतियार फिर्ता ल्याउन सरकारले विशेष अपरेशन सञ्चालन गर्ने घोषणा गरेका छन्।
शनिबार काठमाडौंमा आयोजित राष्ट्रिय वृहत आर्थिक बहस २.० कार्यक्रममा उनले अहिले पनि ५ हजारभन्दा बढी कैदी फरार रहेको र सुशासन नदिँदा द्वन्द्व दोहोरिन सक्ने जोखिम रहेको चेतावनी दिए।
उनका अनुसार हालसम्म १४ हजार ५४९ मध्ये ९ हजार ५२१ जना कैदी फिर्ता आइसकेका छन्, भने ७१० हतियार पुनः प्राप्त भइसकेका छन्। अर्यालले बाँकी कैदी र हतियार फिर्ता गर्न नागरिक तहको सहयोग आवश्यक रहेको बताए।
उनले कानूनी राज्यको जगेर्ना गर्नु आफ्नो दायित्व भएको बताउँदै भने, “सुरक्षा र सुशासन बिना विकास सम्भव छैन, त्यसका लागि सरकार अब निर्णायक कदम चाल्दैछ।”
