मधेश प्रदेशमा नेतृत्व परिवर्तन, प्रदेश प्रमुख सुमित्रा सुवेदी भण्डारीलाई पदमुक्त गर्दै सुरेन्द्र लाभ कर्णलाई नयाँ प्रदेश प्रमुखका लागि राष्ट्रपति समक्ष सिफारिस
काठमाडौ । सरकारले मधेश प्रदेशमा नेतृत्व परिवर्तन गरेको छ। सोमबार सिंहदरबारमा बसेको मन्त्रिपरिषद् बैठकले प्रदेश प्रमुख सुमित्रा सुवेदी भण्डारीलाई पदमुक्त गर्दै सुरेन्द्र लाभ कर्णलाई नयाँ प्रदेश प्रमुखका लागि राष्ट्रपति समक्ष सिफारिस गर्ने निर्णय गरेको हो।
सरकारका प्रवक्ता तथा सञ्चार, सूचना तथा प्रविधि मन्त्री जगदीश खरेलका अनुसार पछिल्ला मधेश प्रदेशका राजनीतिक घटनाक्रमलाई ध्यानमा राख्दै यो निर्णय गरिएको हो। भण्डारी हालसम्म प्रदेश प्रमुखको रूपमा कार्यरत रहँदै आएकी थिइन्।
सिफारिस भएका सुरेन्द्र लाभ कर्ण मधेश प्रदेशका सक्रिय राजनीतिक व्यक्तित्व हुन् र लामो समयदेखि प्रदेशको राजनीतिक र प्रशासनिक विषयमा संलग्न रहँदै आएका छन्। मन्त्रिपरिषद्ले राष्ट्रपतिसमक्ष सिफारिस पठाइसकेकाले अब उनको औपचारिक नियुक्ति राष्ट्रपतिको निर्णयपछि हुने बताइएको छ।
यसअघि पनि सरकारले विभिन्न प्रदेशहरूमा प्रमुखहरूको अदली–बदली गर्दै आएको थियो। मधेश प्रदेशमा भएको यो निर्णयलाई सत्तारूढ गठबन्धनभित्रको नयाँ सन्तुलन र राजनीतिक पुनर्संरचनाको संकेतका रूपमा हेरिएको छ।
