कोशी प्रदेश माओवादी नेता इन्द्र आङ्बो चढ्ने गाडीको ठक्करबाट एक जनाको मृत्यु
विराटनगर । नेकपा (माओवादी केन्द्र) कोशी प्रदेश संसदीय दलका नेता इन्द्रबहादुर आङ्बोले प्रयोग गर्दै आएको सरकारी गाडीको ठक्करबाट बिहीबार मोरङमा १ जनाको मृत्यु भएको छ ।
आङ्बो चढ्दै आएको कोशी प्रदेशसभाको को १ झ ६५० नम्बरको स्कोरपिओ गाडीको ठक्करबाट ग्रामथान गाउँपालिका–५ का अन्दाजी ३५ वर्षीय प्रवेश चौधरीको मृत्यु भएको प्रहरीले जनाएको छ ।
मोरङ प्रहरी प्रवक्ता डीएसपी कोपिला चुँडालका अनुसार विराटनगरबाट विराटचोकतर्फ जाँदै गरेको स्कोरपिओले बाटो क्रस गर्दै गरेको को ९ प ७९ नम्बरको मोटरसाइकलाई ग्रामथान–५ ककडमाडीमा दिउँसो १२ः१५ बजेतिर ठक्कर दिएको थियो ।
स्थानीयका अनुसार तीव्र गतिमा रहेको गाडीको ठक्करबाट मोटरसाइकल चालक चौधरी गम्भीर घाइते भएका थिए ।
उनलाई स्थानीयले उद्धार गरेर उपचारका लागि विराटनगरको विराट नर्सिङ होम पठाएका थिए । विराट नर्सिङमै उपचारका क्रममा दिउँसो ३ः१५ बजेतिर चिकित्सकले मृत घोषित गरेको डीएसपी चुँडालले बताइन् ।-बेतना दैनिक
