विराटनगर महानगरद्वारा ५० प्रतिशत अनुदानमा गहुँ र मकैको बिउ वितरण
विराटनगर । विराटनगर महानगरपालिकाले ५० प्रतिशत अनुदानमा गहुँ र मकैको बिउ वितरण सुरु गरेको छ ।
महानगर परिसरमा आयोजित कार्यक्रममा उपमेयर शिल्पा निराला कार्की र आर्थिक विकास समितिका संयोजक श्याम घिमिरे, आर्थिक विकास महाशाखा प्रमुख प्रतीक गड्तौलाले अनुदानको बिउ वितरण सुरु गरेका हुन् ।
कृषिप्रति आकर्षण जगाउन अनुदानमा बिउ वितरण गरिएको महानगरले जनाएको छ । १० हजार ६ सय ३८ केजी गहुँ र ७ सय १४ केजी मकैको बिउ वितरण गरिएको कृषि तथा पशुपन्छी शाखाका संयोजक हीरालाल यादवले जानकारी गराए । ३६ समूह र १० जना कृषकलाई बिउ वितरण गरिनेछ ।
महानगर क्षेत्रभित्र ९ सय हेक्टरमा गहुँ र ३ सय हेक्टरमा मकै खेती हुने गरेको यादवले जानकारी दिए । वडाको सिफारिसका आधारमा १० जना कृषकलाई पनि बिउ वितरण गरिनेछ ।
