इलाममा आगलागी हुंदा एक जनाको मृत्यु, एक जना गम्भीर घाइते
इलाम । इलामको इलाम नगरपालिका–६, गढीथुम्कामा चुल्होमा आगो बाल्ने क्रममा पेट्रोल प्रयोग गर्दा आगलागी भई एक जनाको मृत्यु भएको छ भने एक जना गम्भीर घाइते भएका छन्। जिल्लामा प्राप्त प्रहरी विवरणअनुसार गत मंसिर १८ गते राति करिब १०:३० बजे सो घटना भएको हो।
घटनामा सोही ठाउँका ४२ वर्षीय सन्तोष राई तथा ३२ वर्षीया श्रीमती सृजना राई चुल्हो अगाडि बसिरहेको अवस्थामा पेट्रोल खन्याएर आगो बाल्ने क्रममा एक्कासि आगो ठूलो मात्रामा भड्किएको बताइएको छ। आगलागीबाट सृजनाको शरीरको करिब ६० प्रतिशत भाग जलेको थियो भने सन्तोष राईको दुवै हात, अनुहार र घाँटीमा गम्भीर चोट लागेको प्रहरीले जनाएको छ।
घटनापछि दुवैजनालाई उपचारका लागि जिल्ला अस्पताल इलाममा भर्ना गरिएको थियो। अवस्था जटिल बनेपछि मंसिर १९ गते राति थप उपचारका लागि बिराटनगरतर्फ रिफर गरिएको र उनीहरूलाई ग्रिनक्रस अस्पतालमा उपचार गराइँदै आएको प्रहरीले जनाएको छ।
तर उपचारका क्रममा सृजना राईको मंसिर २४ गते बिहान करिब ४ बजेतिर मृत्यु भएको अस्पताल स्रोत उद्धृत गर्दै जिल्ला प्रहरी इलामले जानकारी दिएको छ। घटनाको विस्तृत विवरण संकलन भइरहेको र मृतकको शव सोही अस्पतालमै राखिएको प्रहरीले जनाएको छ।-नीलोपाटी
