इलाममा चिया श्रमिक दम्पती घरसँगै जले, पत्नीको मृत्यु
इलाम । इलाममा चिया श्रमिक दम्पती घरसँगै जल्दा पत्नीको मृत्यु भएको छ । इलाम नगरपालिका ६, गढीथुम्कास्थित घरसँगै जलेर चिया श्रमिक ३२ वर्षीया सिर्जना राईको मृत्यु भएको हो ।
मंसिर १८ गते राति करिब साढे १० बजे घरमा आगो लाग्दा उनी गम्भीर घाइते भएकी थिइन् । विराटनगरस्थित ग्रिन क्रस अस्पतालमा आज बिहान ४ बजे उपचारक्रममा सिर्जनाको मृत्यु भएको जिल्ला प्रहरी कार्यालयले जनाएको छ ।
आगोले ६० प्रतिशत शरीर जलेकी उनलाई इलाम अस्पतालमा उपचार सम्भव नभएपछि विराटनगर लगिएको थियो । उपचारक्रममा सिर्जनाको मृत्यु भएको जिल्ला प्रहरी कार्यालयका सूचना अधिकारी डिएसपी लक्ष्मी भण्डारीले जानकारी दिए । आगोले घाइते उनका पति सन्तोष राईको त्यही अस्पतालमा उपचार भइरहेको छ ।
इलाम ६ का वडाध्यक्ष दुर्गा श्रेष्ठ (मदन)ले सिर्जनाको शव अस्पतालबाट निकाल्न उपचारमा लागेको करिब ६ लाख रुपैयाँ जुटाउनुपर्ने भएको बताए । ‘अहिलेसम्म करिब २ लाख रुपैयाँ उठाएर पठायौं, अब ४ लाख उठाउन धौ–धौ भएको छ,’ वडाध्यक्ष श्रेष्ठले भने, ‘चन्दा सहयोग गर्न सबैलाई आह्वान गरिरहेका छौं । अस्पतालले पनि थोरै छुट चाहिँ दिने भनेको छ ।’
चुलामा आगो सल्काउन हालिएको पेट्रोलबाट ठूलो आगो उठेपछि घरमा आगलागी भएको र उनीहरूलाई पनि आगोले भेटेको प्रहरीको भनाइ छ । चियाबारीमा श्रमिकका रूपमा रहेका सन्तोष र सिर्जनाका ३ छोराछोरी छन् ।-स्रोत :पालिका पेज
