खोटाङमा गरियो कुकुरलाई झुण्ड्याएर कुटपिट गर्दै क्रूरतापूर्वक हत्या
खोटाङ । खोटाङको बराहपोखरी गाउँपालिकामा बाबुराम मगरले कुकुरलाई झुण्ड्याएर कुटपिट गर्दै क्रूरतापूर्वक हत्या गरेको घटना सार्वजनिक भएको छ। उनले घटनाको फोटो खिचेर फेसबुकमा राखेपछि यो विषय व्यापक रूपमा बाहिर आएको हो।
घटनाका क्रममा मगरको भाले कुकुर र छिमेकीको पोथी कुकुरबीच संसर्ग भइरहेको बेला छुट्याउने प्रयासमा भाले कुकुरले उनका भतिजालाई токेको बताइएको छ। सोही रिसको क्षणमा उनले पोथी कुकुरलाई झुण्ड्याई लगातार कुटेरै ज्यान लिएका थिए। फेसबुकमा उनले ‘सामुदायिक कुकुर मारेको’ दाबी गरे पनि प्रहरीसमक्ष भने ‘आफ्नै कुकुर’ भएको बयान दिएका छन्।
विराटनगरकी पशु अधिकारकर्मी एलिना प्रसाईंले उक्त पोस्टका स्क्रिनशट र तस्वीर संकलन गरी खोटाङ प्रहरीले अनुसन्धान थाल्न जानकारी गराएकी थिइन्। प्रहरी प्रशासनले मुचुल्का तयार गरी पशुपन्छीसम्बन्धी कसुरमा म्याद थप गर्दै अनुसन्धान अघि बढाएको र त्यसपछि मगरलाई तत्क्षण पक्राउ गरिएको जनाएको छ।
मुद्दाको निरन्तर फलोअप टीएफसी नेपालका संस्थापक तुलाराज राजवंशी र एलिनाज एनिमल प्रिजबेसन सेन्टरकी एलिना प्रसाईंको समन्वयमा भइरहेको छ। जिल्ला प्रहरीका अनुसार अभियुक्तलाई थप अनुसन्धानका लागि शुक्रबार जिल्ला अदालतमा पेश गरिएको छ।
पक्राउपछि एलिना र तुलारामसँग भेट हुँदा मगरले बारम्बार हात जोडेर गल्ती स्वीकार गर्दै माफी मागेको अधिकारकर्मीहरूको भनाइ छ। ‘अबदेखि कहिल्यै यस्तो गर्दिनँ, बरु सामुदायिक कुकुरहरूको हेरचाह गर्छु,’ भन्दै उनले पश्चाताप व्यक्त गरेको उनीहरूको बयानमा उल्लेख छ।
नेपालको पशुपन्छीसम्बन्धी ऐनअनुसार यस्ता क्रूर व्यवहारमा कैद वा जरिवाना दुवै सजाय हुनसक्ने व्यवस्था छ। अधिकारकर्मीहरूले कडा कारबाहीको माग गर्दै यस प्रकरणले खोटाङमा पशु अधिकारप्रति जनचेतना बढिरहेको टिप्पणी गरेका छन्।
