लागूऔषध सहित युवायुवती होटलको कोठामा पक्राउ
दमक, २२ पुष । झापाको दमक–८ स्थित एक होटलको कोठाबाट प्रतिबन्धित लागूऔषधसहित तीन जना युवायुवतीलाई प्रहरीले पक्राउ गरेको छ। लागूऔषध कारोबार हुँदै आएको भन्ने गोप्य सूचनाका आधारमा गरिएको छापामार अभियानका क्रममा उनीहरूलाई आइतबार पक्राउ गरिएको जिल्ला प्रहरी कार्यालय झापाले जनाएको छ।
पक्राउ पर्नेहरूमा मोरङको मिक्लाजुङ–३ की १९ वर्षीया मोनिका राई, दमक–१ का २६ वर्षीय सुरज कुमाल र ३१ वर्षीय कृष्णबहादुर श्रेष्ठ रहेका छन्। सोही कोठाबाट नगद ३३ हजार रुपैयाँसँगै खैरो हेरोइन जस्तो देखिने ६ ग्राम ७८० मिलिग्राम पदार्थ समेत बरामद गरिएको प्रहरीले जनाएको छ।
बरामद सामग्रीसहित पक्राउ परेका उनीहरूलाई लागूऔषध सम्बन्धी मुद्दा दर्ता गरी इलाका प्रहरी कार्यालय दमकमार्फत आवश्यक कानुनी प्रक्रिया अघि बढाइएको छ। प्रहरीले यस घटनाबारे थप अनुसन्धान जारी रहेको जनाएको छ।
