झापामा डिजेको बिषयमा दुई पक्षबीच विवाद हुँदा झडप,एक किशोरी घाइते
भद्रपुर । झापाको भद्रपुरस्थित मेची नदी किनारमा सरस्वतीको मूर्ति सेलाउने क्रममा दुई पक्षबीच विवाद हुँदा एक किशोरी घाइते भएकी छन्। गएराति साढे १० बजे डिजे (बाजा) बजाएको विषयलाई लिएर भएको विवादले उग्र रूप लिँदा झडप भएको हो।
स्थानीयका अनुसार भद्रपुर नगरपालिका-५ मा रहेको मेची नदीमा मूर्ति सेलाएर फर्किने क्रममा मेची किनारका युवाहरूले डिजे बन्द गर्न आग्रह गरेका थिए। सोही विषयमा दुई समूहबीच भनाभन सुरु भई कुटपिटसम्मको स्थिति सिर्जना भएको थियो।
विवादका क्रममा झिम्की चोक बस्ने कैलाश साहकी १६ वर्षीया छोरी आँचल साह घाइते भएकी छन्। विपक्षी समूहको कुटपिटबाट उनको बायाँ हात, टाउको र शरीरका विभिन्न भागमा भित्री चोट लागेको छ। घाइते किशोरीलाई तत्काल उपचारका लागि प्रादेशिक अस्पताल भद्रपुर लगिएको छ।
घटनाको जानकारी पाउनासाथ वडा प्रहरी कार्यालय भद्रपुरको टोली घटनास्थल पुगेको थियो। प्रहरी आएको थाहा पाएपछि झडपमा संलग्न दुवै पक्षका युवाहरू फरार भएका छन्। फरार रहेकाहरूको खोजी भइरहेको र घटनाबारे थप अनुसन्धान भइरहेको प्रहरीले जनाएको छ।
समाचार स्रोत : टाइम अफ प्रदेश
