झापाको मेचीनगरमा सवारी दुर्घटनामा परी गम्भीर घाइते भएकी एक महिलाको उपचारका क्रममा मृत्यु
झापा । झापाको मेचीनगर नगरपालिका-७ नमुना टोलस्थित भित्री सडकखण्डमा भएको सवारी दुर्घटनामा परी गम्भीर घाइते भएकी एक महिलाको उपचारका क्रममा मृत्यु भएको छ। गत माघ ११ गते दिउँसो १:३० बजे दुईवटा मोटरसाइकल एकआपसमा ठोक्किँदा भएको दुर्घटनामा घाइते भएकी बिर्तामोड नगरपालिका-७ निवासी ५४ वर्षीया कल्पना भण्डारीको मृत्यु भएको हो।
काँकडभिट्टाबाट भद्रपुरतर्फ जाँदै गरेको मे ९ प ६३९४ नम्बरको मोटरसाइकल र विपरीत दिशाबाट आउँदै गरेको प्र.१-०१-०१७ प ४२६५ नम्बरको मोटरसाइकल एकापसमा ठोक्किएका थिए। दुर्घटनामा ६३९४ नम्बरका मोटरसाइकल चालक ६४ वर्षीय भोजराज भण्डारी सामान्य घाइते हुनुभएको थियो भने उहाँकी श्रीमती कल्पना भण्डारीको टाउको र शरीरमा गम्भीर चोट लागेको थियो।
गम्भीर घाइते भण्डारीलाई तत्काल उपचारका लागि बिर्तामोडस्थित बी एण्ड सी (B&C) अस्पताल पुर्याइएको थियो। अस्पतालमा उपचारकै क्रममा आइतबार (माघ १४ गते) बिहान १०:१५ बजे उहाँको निधन भएको प्रहरीले जनाएको छ। मृतकको शव हाल सोही अस्पतालमा राखिएको छ।
यसैबीच, दुर्घटनामा संलग्न अर्को ४२६५ नम्बरको मोटरसाइकलका चालक मेचीनगर नगरपालिका-६ बस्ने ४३ वर्षीय युवराज मुखियालाई इलाका प्रहरी कार्यालय काँकडभिट्टाले नियन्त्रणमा लिएको छ। घटनाका सम्बन्धमा प्रहरीले थप आवश्यक अनुसन्धान गरिरहेको जनाएको छ।
