खाडी मुलुक जाने कामदारका लागि श्रम स्वीकृति प्रदान गर्ने कार्य अस्थायी रूपमा स्थगित
काठमाडौ । सरकारले मध्यपूर्वमा चर्किँदै गएको युद्धजन्य अवस्थालाई मध्यनजर गर्दै खाडी मुलुक जाने कामदारका लागि श्रम स्वीकृति प्रदान गर्ने कार्य अस्थायी रूपमा स्थगित गरेको छ।
राजेन्द्रसिंह भण्डारी ले इजरायल, अमेरिका र इरानबीचको बढ्दो तनावका कारण खाडी क्षेत्रको सुरक्षा अवस्था जटिल बन्दै गएको भन्दै अर्को सूचना जारी नभएसम्म वैदेशिक रोजगारीमा जाने श्रमिकलाई श्रम स्वीकृति नदिने निर्णय गरिएको जानकारी दिए। हालसम्म वैदेशिक रोजगार विभाग ले खाडी मुलुकलगायत विभिन्न देश जाने कामदारलाई श्रम स्वीकृति प्रदान गर्दै आएको थियो।
इजरायल र अमेरिकाले इरानमा मिसाइल आक्रमण गरेपछि इरानले युनाइटेड अरब इमिरेट्स, कतार, ओमान, कुवेतलगायत देशमा रहेका अमेरिकी सैन्य अड्डाहरूलाई लक्षित गरी आक्रमण सुरु गरेको छ। यसले ती देशहरूमा कार्यरत नेपालीहरूको सुरक्षाबारे चासो बढाएको छ।
मन्त्री भण्डारीले सम्बन्धित देशतर्फ जान विमानस्थलमा रहेका नेपालीलाई हालका लागि घर फर्किन अनुरोध गरिएको बताए। उनले खाडी क्षेत्रमा सुरक्षा सतर्कता उच्च स्तरमा पुगेको उल्लेख गर्दै सरकार परिस्थितिप्रति गम्भीर र सजग रहेको बताए।
श्रम मन्त्रालयले आफ्नो कल सेन्टर २४ घण्टा तयारी अवस्थामा राखेको जनाएको छ। साथै परिस्थिति थप बिग्रिए नेपालीहरूको उद्धार गर्नुपर्ने अवस्था आएमा त्यसका लागि समेत तयारी भइरहेको मन्त्री भण्डारीले बताए।
“परिस्थिति कसरी विकसित हुन्छ भन्ने आधारमा आवश्यक निर्णय लिइनेछ। उद्धार गर्नुपर्ने अवस्था आएमा त्यसका लागि योजना बनाउने काम भइरहेको छ,” उनले भने।
सरकारले मध्यपूर्वको विकसित अवस्थालाई निरन्तर अनुगमन गरिरहेको जनाएको छ।
