पूर्व–पश्चिम लोकमार्गको नाम परिवर्तनबारे टिप्पणी गर्दै हर्क साम्पाङले दिए यलम्बरको नाममा राख्नुपर्ने सुझाव
काठमाडौ । हर्क साम्पाङले पूर्व–पश्चिम लोकमार्गको नाम परिवर्तनबारे टिप्पणी गर्दै यसलाई यलम्बरको नाममा राख्नुपर्ने सुझाव दिएका छन्। उनले सामाजिक सञ्जालमार्फत प्रतिक्रिया दिँदै “महेन्द्र हाइवेभन्दा पनि यलम्बर हाइवे राख्न पाए राम्रो हुन्थ्यो” भन्ने अभिव्यक्ति दिएका हुन्।
सरकारले सार्वजनिक गरेको राष्ट्रिय प्रतिबद्धता पत्रमा पूर्व–पश्चिम लोकमार्गलाई तीन वर्षभित्र अन्तर्राष्ट्रिय मापदण्डअनुसार स्तरोन्नति गर्ने लक्ष्य राखिएको छ। सो योजनालाई लिएर सामाजिक सञ्जालमा पुनः “महेन्द्र राजमार्ग” नाम प्रयोग हुनसक्ने चर्चा चलिरहेको सन्दर्भमा साम्पाङको टिप्पणी आएको हो।
पूर्व–पश्चिम लोकमार्ग नेपालको सबैभन्दा महत्वपूर्ण सडक संरचना मानिन्छ, जसलाई पहिले राजा महेन्द्रको नाममा महेन्द्र राजमार्ग भनिन्थ्यो। गणतन्त्र स्थापनापछि यसको नाम प्रयोग र पहिचानबारे विभिन्न बहस हुँदै आएको छ।
साम्पाङको यो अभिव्यक्तिले सामाजिक सञ्जालमा फेरि नामकरण र ऐतिहासिक पहिचानबारे बहस चर्किएको देखिन्छ। केही प्रयोगकर्ताले यसलाई सांस्कृतिक पहिचानसँग जोडेर समर्थन गरेका छन् भने केहीले पूर्वाधारको नामभन्दा विकास प्राथमिक हुनुपर्ने प्रतिक्रिया दिएका छन्।
