पार्टीका सदस्यहरूलाई हर्क साम्पाङको आग्रह:’श्रमदान र संगठन विस्तारमा केन्द्रित हुनु’
काठमाडौं । श्रम संस्कृति पार्टीका अध्यक्ष हर्क साम्पाङले श्रम संस्कृति पार्टीका नेता, कार्यकर्ता तथा सदस्यहरूलाई श्रमदान, संगठन विस्तार र जिम्मेवारीप्रति गम्भीर बन्न आग्रह गरेका छन् ।
शनिबार काठमाडौंमा आयोजित एक कार्यक्रममा बोल्दै उनले श्रम संस्कृति पार्टीलाई काम गर्ने पार्टीका रूपमा स्थापित गर्न प्रत्येक सदस्य सक्रिय हुनुपर्ने बताए ।
“श्रम–संस्कृति पार्टी काम गर्ने पार्टी हो । प्रत्येक सदस्यले श्रमदान गर्नुपर्छ । एक्लै भए पनि बिरुवा रोप्ने, सरसफाइ गर्ने वा सामाजिक काम सुरु गर्नुपर्छ,” उनले भने, “हिजो म एक्लै अभियानमा थिएँ, आज हजारौँ मानिस जोडिएका छन् । यो सफलता होइन, निरन्तरताको परिणाम हो ।”
पार्टी निर्माणको चरणमा रहेको उल्लेख गर्दै उनले सक्रिय सदस्यहरूलाई मात्रै महाधिवेशनमा उम्मेदवारी दिन र मतदान गर्न पाउने व्यवस्था गरिने जानकारी दिए ।
