काभा भलिबलमा आज नेपाल र माल्दिभ्स बिचमा प्रतिस्पर्धा हुने
काठमाडौं, १० जेठ। नेपाल र माल्दिभ्स बिच आज रोचक प्रतिस्पर्धा हुदैँछ।
काठमाडौंमा जारी रहेको काभा महिला भलिबल च्याम्पियनसिपमा आज नेपाल र माल्दिभ्सका बिचमा प्रतिस्पर्धा हुन लागेको हो ।
जारी प्रतिस्पर्धात्मक खेलमा माल्दिभ्सलाई हराउँदै नेपालले सेमिफाइनल प्रवेश गर्ने लक्ष्य राखेको छ।
समूह चरण अन्तिम खेलमा माल्दिभ्स र नेपाल त्रिपुरेश्वरमा रहेको राष्ट्रिय खेलकुद परिषदको कर्भडहलमा साँझ ५ बजे खेल्दैछन् ।
यस खेलमा सोझो सेटमा जित हासिल गर्दै नेपाल सेमिफाइनलमा स्थान पक्का गर्न चाहान्छ । पाँचौ सेटमा पुगेर जितेमा नेपालले सेमिफाइनल प्रवेशका लागि सोमबार हुने भारत र कीर्गिस्तानबीचको खेल कुर्नु पर्ने हुन्छ ।
लगातार २ खेलमा सोझो सेटमा पराजित माल्दिभ्स अंकबिहिन रुपमा एक खेल अगावै प्रतियोगिताबाट बाहिरिसकेको छ । पहिलो खेलमा कीर्गिस्तान र दोस्रो खेलमा भारतसँग माल्दिभ्स पराजित भएको थियो ।
नेपाल भने पहिलो खेलमा भारतसँग ३-२ सेटमा पराजित हुँदा पछिल्लो खेलमा कीगिस्तानमाथि ३-० को सोझो सेटमा विजयी भएको थियो । नेपाल रहेको समूह ‘ए’ मा भारत ५ अंकका साथ शीर्ष, घरेलु टोली ४ अंकका साथ दोस्रो, कीर्गिस्तान ३ अंकका साथ तेस्रो र अंकबिहिन माल्दिभ्स चौथो स्थानमा छन् ।
समूहको शीर्ष २ मा रहने टोलीले सेमिफाइनलमा स्थान बनाउँने छन् । समूह ‘बी’ मा इरान, श्रीलंका, कजाखस्तान र बंगलादेश रहेका छन् ।
