प्रेस स्वतन्त्रताको पक्षमा जेठ १४ गते ‘कालो’ राख्न पत्रकार महासंघको आह्वान
काठमाडौं । नेपाल पत्रकार महासंघले प्रेस स्वतन्त्रता र सञ्चारमाध्यमको अस्तित्वमाथि हस्तक्षेप भएको भन्दै देशभरका सञ्चारमाध्यमलाई जेठ १४ गते सम्पादकीय वा अन्य उपयुक्त स्थानमा ‘कालो’ राखेर ऐक्यबद्धता जनाउन आह्वान गरेको छ ।
महासंघले बुधबार जारी गरेको विज्ञप्तिमा सरकारले पत्रकारमाथि निगरानी बढाउने, समाचार संकलनमा अवरोध गर्ने, श्रमजीवी पत्रकारको अधिकार संरक्षण नगर्ने तथा आर्थिक नाकाबन्दी गर्ने गतिविधि गरिरहेको आरोप लगाएको छ ।
महासंघका महासचिव रामप्रसाद दाहालद्वारा हस्ताक्षरित विज्ञप्तिमा प्रधानमन्त्री तथा मन्त्रिपरिषद् कार्यालयले २०८२ चैत १८ गते गरेको निर्णयप्रति विशेष आपत्ति जनाइएको छ । उक्त निर्णयअनुसार सरकारी सूचना तथा विज्ञापन राज्य नियन्त्रित सञ्चारमाध्यमलाई मात्र दिने व्यवस्था गरिएको भन्दै महासंघले यसलाई स्वेच्छाचारी र विभेदकारी निर्णयको संज्ञा दिएको छ ।
महासंघका अनुसार उक्त निर्णयले देशभरका सामुदायिक तथा निजी सञ्चारमाध्यमको दीगोपनमाथि गम्भीर असर पार्नुका साथै श्रमजीवी पत्रकारको पेसागत सुरक्षामा समेत चुनौती सिर्जना गरेको छ ।
उक्त निर्णय खारेजको माग गर्दै महासंघले चरणबद्ध दबाबमूलक आन्दोलन सञ्चालन गरिरहेको जनाएको छ । आन्दोलनअन्तर्गत जेठ १४ गते सम्पादकीय वा अन्य स्थानमा कालो राखेर समर्थन जनाउन सबै सञ्चारमाध्यमलाई आग्रह गरिएको हो ।
महासंघले यसअघि सञ्चालन गरिएका आन्दोलन तथा दबाबमूलक कार्यक्रममा साथ र समर्थन गर्ने सञ्चारमाध्यमप्रति आभार समेत व्यक्त गरेको छ ।
