आइतबार बिदा हटाउने संकेत, कोशी सरकार पुनरावलोकनको तयारीमा
विराटनगर । कोशी प्रदेश सरकारले सरकारी कार्यालयमा लागू गरिएको आइतबारको सार्वजनिक बिदा पुनरावलोकन गर्ने संकेत गरेको छ।
सेवा प्रवाहको प्रभावकारिता र नागरिकको सहजतालाई ध्यानमा राख्दै प्रदेश सरकारले बिदा व्यवस्थाबारे पुनर्विचार गर्ने भएको हो। आर्थिक वर्ष २०८३/८४ को बजेट प्रस्तुत गर्दै आर्थिक मामिला तथा योजनामन्त्री विदुर लिङ्थेप ले आइतबारको बिदा पुनरावलोकन गरिने घोषणा गरेका हुन्।
प्रदेश सरकारले संघीय सरकारको अभ्याससँग मेल खाने उद्देश्यले लागू गरिएको आइतबारको बिदाले अपेक्षित नतिजा दिन नसकेको निष्कर्षतर्फ उन्मुख देखिएको छ। बजेट वक्तव्यमार्फत सार्वजनिक भएको यो संकेतले प्रशासनिक संरचना र सेवा प्रवाहलाई थप प्रभावकारी बनाउने लक्ष्य राखेको बुझिएको छ।
यसअघि हिक्मतकुमार कार्की ले पनि आइतबारको बिदा हटाउने विषयमा सार्वजनिक रूपमा धारणा व्यक्त गर्दै सरोकारवालासँग सुझाव मागेका थिए।
