धनकुटाको साँगुरीगढी गाउँपालिका वडा स्तरीय चौथो पुरुष तथा महिला रनिङ शिल्ड फुटबल सम्पन्न
हिराराज राई, धनकुटा । धनकुटाको साँगुरीगढी गाउँपालिकामा गाउँपालिका वडा स्तरीय चौथो रनिङ शिल्ड पुरुष तथा महिला फुटबल प्रतियोगिता २०८३ सम्पन्न भएको छ।
असार ४ गतेदेखि ७ गतेसम्म सञ्चालन भएको प्रतियोगिताका खेलहरू वडा नं. ३ स्थित खुवाफोक खेलमैदानमा सम्पन्न भएका हुन्। प्रतियोगितामा गाउँपालिकाभित्रका १० वटै वडाबाट पुरुष तथा महिला खेलाडीहरूको उत्साहजनक सहभागिता रहेको आयोजकले जनाएको छ।
प्रतियोगिताको महिलातर्फ वडा नं. ३ ले वडा नं. ४ लाई ५-० गोलअन्तरले पराजित गर्दै विजेता बनेको छ भने वडा नं. ४ उपविजेता बनेको छ। त्यसैगरी पुरुषतर्फ वडा नं. ५ ले वडा नं. ४ लाई २-१ गोलअन्तरले पराजित गर्दै विजेता बनेको छ भने वडा नं. ४ उपविजेता बनेको छ। महिलातर्फ विजेता बनेसँगै वडा नं. ३ खुवाफोकले लगातार तेस्रो पटक उपाधि जित्दै रनिङ शिल्ड हात पारेको छ।
प्रतियोगितामा पुरुषतर्फ विजेता हुने टिमले नगद ६० हजार रुपैयाँसहित शिल्ड, मेडल र प्रमाणपत्र प्राप्त गरेको छ भने उपविजेता टिमले नगद ४० हजार रुपैयाँसहित शिल्ड, मेडल र प्रमाणपत्र प्राप्त गरेको छ। त्यसैगरी महिलातर्फ विजेता टिमले नगद ३० हजार रुपैयाँसहित शिल्ड, मेडल र प्रमाणपत्र प्राप्त गरेको छ भने उपविजेता टिमले नगद २० हजार रुपैयाँसहित शिल्ड, मेडल र प्रमाणपत्र प्राप्त गरेको आयोजकले जनाएको छ।
खेलाडीहरूलाई थप प्रोत्साहन गर्ने उद्देश्यले आयोजकले विभिन्न विधागत पुरस्कारहरू समेत वितरण गरेको थियो। प्रतियोगितामा उत्कृष्ट गोलरक्षक, मिडफिल्डर, फरवार्ड, डिफेन्डर, उदयमान खेलाडी, सर्वाधिक गोलकर्ता तथा सर्वोत्कृष्ट खेलाडीलाई विशेष सम्मान प्रदान गरिएको छ।
विजेता तथा उपविजेता खेलाडीहरूलाई साँगुरीगढी गाउँपालिकाका अध्यक्ष जितेन्द्र राई, वडा नं. ३ का कार्यवाहक वडाध्यक्ष केशर लिम्बू र ३ नं. वडा स्तरीय खेलकुद विकास समिति खुवाफोक धनकुटाका पदाधिकारीहरूले पुरस्कार वितरण गर्नुभएको थियो।
साँगुरीगढी गाउँपालिका भेडेटारको आयोजना तथा साँगुरीगढी गाउँपालिका ३ नं. वडा स्तरीय खेलकुद विकास समिति खुवाफोक धनकुटाको व्यवस्थापनमा प्रतियोगिता सञ्चालन गरिएको थियो।
प्रतियोगिताले गाउँपालिकाभित्र खेलकुदको विकास, प्रतिभाको पहिचान तथा युवायुवतीहरूबीच आपसी सद्भाव, एकता र प्रतिस्पर्धात्मक भावना अभिवृद्धि गर्न महत्वपूर्ण योगदान पुर्याएको आयोजकको विश्वास रहेको छ।
