केप भेर्डे बिरूद्द अर्जेन्टिनाकाे संघर्षपुर्ण जीत
काठमाडौं, २० असार । केप भेर्डेविरुद्ध संघर्षपूर्ण जित हासिल गर्दै साबिक विजेता अर्जेन्टिना फिफा विश्वकप २०२६ को प्रि–क्वार्टरफाइनलमा प्रवेश गरेको छ ।
अतिरिक्त समयमा धकेलिएको खेलमा अर्जेन्टिनाले ३–२ ले विजयी हासिल गर्यो । तीन गोल अतिरिक्त समयमै सम्भव भएका थिए ।
शनिबार नेपाली समयअनुसार बिहान ३ः४५ बजे सुरु भएको खेलमा कप्तान लियोनल मेसीले अर्जेन्टिनालाई अग्रतामा ल्याएका थिए । उनले २९औं मिनेटमा ‘क्लास गोल’ गरे । मेसीले सेन्टरब्याक लिसान्ड्रो मार्टिनेजको लामो दूरीको पासलाई सुन्दर तारिकाले नियन्त्रण गरे । त्यसपछि गोलकिपर भोजिन्हालाई बिट गरे ।
अतिरिक्त समयमा मार्टिनेजले नै अर्जेन्टिनालाई २–१ को स्थितिमा पुर्याए । मिडफिल्डर एलेक्सिस म्याकेलेस्टरको पासमा मार्टिनेजले बक्स भित्र सुन्दर प्रहार गर्दै बललाई पहिलो बारको जाली चुमाए । त्यसअघि निर्धारित समयको ५९औं मिनेटमा राइट साइडबाट आएको कटब्याकलाई डेरोय डुआर्टेले सदुपयोग गरे ।
मार्टिनेजको गोलपछि पछाडि परेको केप भेर्डे अतिरिक्त समयको पहिलो हाफमै खेलमा पुनः फर्कियो । सिड्नी लोपेस काब्राले सनसनीपूर्ण गोल गरे । विश्वकप २०२६ कै उत्कृष्ट गोलमध्ये एक थियो काब्राको गोल । उनले बक्स बाहिरबाट राइट फुटेड प्रहारले फार पोस्टको टप कर्नर जाली चुमाए ।
खेलको १११औं मिनेटमा सेन्टरब्याक डिने बोर्जेसले आत्मघाती गोल गर्न पुगे । मेसीको क्रसमा क्रिस्टियन रोमेरोले हेडरमार्फत बललाई पोस्टको दिशा दिन खोजेका थिए । अन्त्यमा बल डिनेसँग लाग्दै पोस्टभित्र गयो ।
यस विश्वकपमा मेसीको यो सातौं गोल हो । उनी उच्च गोलकर्ताको दौडमा शीर्ष स्थानमा छ । उनलाई ६ गोलसहित फ्रान्सका कप्तान किलियन एमबाप्पेले पछ्याइरहेका छन् ।
अब अर्जेन्टिनाले क्वार्टरफाइनल प्रवेशका लागि मंगलबार इजिप्टसँग खेल्नेछ । खेल नेपाली समयअनुसार राति ९ः४५ बजे हुनेछ ।
