कोशी प्रदेशमा लागूऔषध सहित ५ जना पक्राउ
विराटनगर, असार २० । कोशी प्रदेश प्रहरीले लागूऔषधविरुद्ध सञ्चालन गरेको महाअभियानअन्तर्गत विभिन्न जिल्लाबाट लागूऔषधसहित पाँच जनालाई पक्राउ गरेको छ। पक्राउ परेकाहरूको साथबाट १२ ग्राम ४१ मिलिग्राम ब्राउन सुगर, ३९ मिलिग्राम चरेस र ६ किलो २८० ग्राम गाँजा बरामद गरिएको प्रहरीले जनाएको छ।
मोरङको कटहरी गाउँपालिका–२ मा प्रहरी चौकी कटहरीबाट खटिएको टोलीले ७ ग्राम ४१ मिलिग्राम ब्राउन सुगर र ३९ मिलिग्राम चरेससहित प्रदीप सिंह, राकेश सिंह र कटहरी–४ का कपिल मुखियालाई पक्राउ गरेको छ।
यस्तै, इलाका प्रहरी कार्यालय रानी तथा बुधनगरबाट खटिएको टोलीले मोरङको जहदा गाउँपालिका–२ बाट जहदा गाउँपालिका–७ का एक बालकलाई ६ किलो २८० ग्राम गाँजासहित नियन्त्रणमा लिएको छ।
त्यसैगरी, सुनसरीको धरान–५ मा कोशी प्रदेश प्रहरी कार्यालय विराटनगर, अस्थायी प्रहरी पोस्ट जोरसखुवा र देउरालीबाट परिचालित टोलीले धरान–५ का पर्वत दर्जीलाई ५ ग्राम ब्राउन सुगरसहित पक्राउ गरेको प्रहरीले जनाएको छ।
प्रहरीका अनुसार लागूऔषधमुक्त समाज निर्माण गर्ने उद्देश्यका साथ प्रदेशभर लागूऔषधविरुद्धको अभियानलाई निरन्तरता दिइएको छ। पक्राउ परेका सबैविरुद्ध लागूऔषधसम्बन्धी कसुरमा आवश्यक कानुनी प्रक्रिया अघि बढाइएको प्रहरीले जनाएको छ।
