गृहमन्त्री सुदन गुरुङद्वारा मोरङ जिल्ला प्रहरी कार्यालयको निरीक्षण, नागरिकमैत्री सेवा दिन निर्देशन
विराटनगर, असार २० । गृहमन्त्री सुदन गुरुङले शनिबार मोरङ जिल्ला प्रहरी कार्यालयको निरीक्षण गरेका छन्।
निरीक्षणका क्रममा गृहमन्त्री गुरुङले कार्यालयका विभिन्न शाखा, हिरासत कक्ष, स्टाफ ब्यारेकलगायतको अवलोकन गर्नुका साथै कार्यरत प्रहरी कर्मचारीसँग प्रत्यक्ष छलफल गर्दै उनीहरूको पिरमर्का र गुनासो सुने।
उनले समाजमा अपराध नियन्त्रण गर्दै शान्ति–सुरक्षा कायम राख्न प्रहरीबीच आपसी भाइचारा र सहयोगी भावना अभिवृद्धि गर्न, आचरण तथा व्यवहारमा सुधार ल्याउन र आफ्नो कर्तव्य, जिम्मेवारी तथा अधिकारको इमानदारीपूर्वक पालना गर्न निर्देशन दिए।
गृहमन्त्री गुरुङले संगठनको हित र उद्देश्यलाई सदैव प्राथमिकतामा राख्दै नागरिकमैत्री प्रहरी सेवा प्रवाह गर्न पनि प्रहरी कर्मचारीलाई निर्देशन दिएका छन्।
