जंगली हात्तीको आक्रमणबाट आमा र ४ वर्षीय छोराको मृत्यु
चितवन, असार २१ — चितवनको भरतपुर महानगरपालिका–२३ बेलहट्टामा शनिबार राति जंगली हात्तीको आक्रमणबाट आमा र उनका ४ वर्षीय छोराको दुःखद मृत्यु भएको छ।
प्रहरीका अनुसार शनिबार राति करिब ११ बजे पूर्ण बोटेको घरमा पसेको जंगली हात्तीले घरभित्र सुतिरहेका उनकी २५ वर्षीया श्रीमती आशिका बोटे र ४ वर्षीय छोरा भरत बोटेमाथि आक्रमण गरेको थियो। आक्रमणमा गम्भीर घाइते भएका दुवैको घटनास्थलमै मृत्यु भएको प्रहरीले जनाएको छ।
हात्तीलाई धपाउने प्रयासमा पूर्ण बोटेले आगो बाल्दा उनको कच्ची घरमा समेत आगलागी भएको थियो। घटनाको जानकारी पाएपछि नेपाली सेना र इलाका प्रहरी कार्यालय गीतानगरबाट खटिएको टोलीले आगो नियन्त्रणमा लिएको थियो।
घटनाबारे प्रहरीले थप अनुसन्धान गरिरहेको छ।
