संसदमा गृहमन्त्रीको आक्रोश: गणेश नेपालीको मृत्युमा राजनीति गर्नेहरू अस्पतालमा कति जना पुग्नुभयो?
काठमाडौं । राहदानी विभाग अगाडि आत्मदाहको प्रयास गरी उपचारका क्रममा निधन भएका गणेश नेपालीको घटनालाई लिएर संसदमा भइरहेको आलोचनाप्रति गृहमन्त्री सुधन गुरुङले कडा आपत्ति जनाएका छन्। शुक्रबार बसेको प्रतिनिधिसभाको बैठकमा गृहमन्त्री गुरुङले आफूले गरेको कामलाई ‘स्टन्टबाजी’ भनी टिप्पणी गर्ने सांसदहरूप्रति लक्षित गर्दै खरो जवाफ फर्काएका हुन्।
संसदमा सम्बोधन गर्दै गृहमन्त्री गुरुङले भने, “हिजो जब गणेश नेपालीको निधन भयो, त्यसपछि घाँटी चिच्याएर यहाँ प्रश्न उठाउनेहरूमध्ये कति जना हस्पिटल पुग्नुभएको थियो? म यो सम्मानित सदनलाई सोध्न चाहन्छु।”
उनले जनताको सेवा गर्ने नाममा मुखले मात्रै ठूला कुरा गर्ने परम्परा अब अन्त्य हुनुपर्नेमा जोड दिए। “जनताको सेवा गर्छु भनेर मुखले बोलेको ५० औं वर्ष भइसक्यो। अब मुखले होइन, हातले काम गर्नुपर्छ। काम गर्ने ठाउँमा नै पुग्नुपर्छ,” गृहमन्त्री गुरुङले भने।
केही सांसदहरूले आफ्नो सक्रियतालाई ‘स्टन्टबाजी’ को संज्ञा दिएकोमा असन्तुष्टि जनाउँदै उनले स्पष्ट पारे, “मलाई कसैको नजरमा स्टन्टबाजी गर्न कुनै रहर छैन। म यो देश र जनताको सेवा गर्नका लागि मन्त्री बनेको हुँ।”
उनले गृह प्रशासनलाई कसरी थप जनमुखी बनाउने भन्ने विषयमा आफू र आफ्नो टिम निरन्तर छलफलमा जुटेको बताए। उनले सो घटनामा आफूले बिरामीलाई बचाउन हरसम्भव प्रयास गरेको भए पनि दुर्भाग्यवश बचाउन नसकिएको भन्दै दुःख व्यक्त गरे।
गणेश नेपालीको मृत्यु र सो प्रकरणमा सरकारको भूमिकालाई लिएर विपक्षी दलहरूले सदनमा चर्को आलोचना गरेपछि गृहमन्त्री गुरुङ रक्षात्मक र केही भावुक देखिएका थिए। आफ्नो भनाइ राख्ने क्रममा केही बेर भावुक बनेका उनले पुन: सम्हालिँदै सरकारको बचाउ गरे। उनले यस्ता संवेदनशील घटनामा राजनीति नगर्न र रचनात्मक आलोचना गर्न आग्रह गर्दै आफ्नो कार्यशैली परिणाममुखी हुने दाबी गरे।
