बालकलाई जोगाउन खोज्दा अटो दुर्घटना, चालक सहित ६ जना घाइते
नवलपरासी (पश्चिम), साउन ५ — नवलपरासी (पश्चिम)को बर्दघाट नगरपालिका–४ स्थित पूर्व–पश्चिम राजमार्गमा बालकलाई बचाउने क्रममा अटो अनियन्त्रित भएर दुर्घटना हुँदा चालकसहित ६ जना घाइते भएका छन्।
मंगलबार बिहान करिब ८ः४५ बजे पूर्वबाट पश्चिमतर्फ जाँदै गरेको लु १ ह ३७४० नम्बरको अटो बाटो काट्दै गरेका एक बालकलाई जोगाउन खोज्दा अनियन्त्रित भई दुर्घटनामा परेको प्रहरीले जनाएको छ।
दुर्घटनामा घाइते भएका चार जनाको लुम्बिनी सिटी अस्पताल, बुटवल र दुई जनाको चिसापानी अस्पतालमा उपचार भइरहेको छ। घाइते सबैको अवस्था सामान्यदेखि मध्यम रहेको प्रहरीले जनाएको छ।
घाइते हुनेमा अटो चालक सुस्ता गाउँपालिका–१ निवासी ४५ वर्षीय प्रेमबहादुर जर्घा, बर्दघाट नगरपालिका–१६ निवासी ७० वर्षीय मानबहादुर सिंजाली, १६ वर्षीया दृष्टि सारु मगर, ३८ वर्षीया ललिसरा सारु मगर, ४० वर्षीया अनिता गाहा मगर तथा १६ वर्षीया निरमा गाहा मगर रहेका छन्।
घटनाबारे प्रहरीले थप अनुसन्धान गरिरहेको जनाएको छ।
