होटलको पलङभित्र युवती मृत फेला परेको घटनामा दुई पक्राउ
काठमाडौं, साउन ५ । काठमाडौं महानगरपालिका–२६ गोंगबुस्थित मित्रनगरमा रहेको माउन्टेन एक्सेल्सिभा होटलमा एक युवती मृत अवस्थामा फेला परेको घटनामा संलग्न रहेको आरोपमा प्रहरीले दुई जनालाई पक्राउ गरेको छ।
गत साउन ३ गते बिहान करिब ११ बजे होटलको चौथो तलाको ४०४ नम्बर कोठामा रहेको काठको बक्स पलङभित्र एक महिलाको शव रहेको सूचना प्राप्त भएपछि जिल्ला प्रहरी परिसर काठमाडौंको टोली घटनास्थल पुगेको थियो। त्यसपछि प्रहरीले घटनाबारे विस्तृत अनुसन्धान अघि बढाएको थियो।
प्राविधिक विश्लेषणका आधारमा मृतकको पहिचान कैलालीको धनगढी उपमहानगरपालिका–७ स्थायी घर भई हाल काठमाडौंको माछापोखरी बस्दै आएकी २५ वर्षीया निशा सुनारका रूपमा भएको प्रहरीले जनाएको छ।
अनुसन्धानका क्रममा घटनामा संलग्न रहेको आरोपमा दैलेखको डुङ्गेश्वर गाउँपालिका–६ लटाली स्थायी घर भई हाल काठमाडौं–३ चक्रपथस्थित सम्बाला होटल आसपास बस्ने २७ वर्षीय रमेश बुढा र जुम्लाको चन्दननाथ नगरपालिका–२ घर भई काठमाडौं बस्दै आएका ३८ वर्षीय दानबहादुर शाहीलाई पक्राउ गरिएको प्रहरीले जनाएको छ।
पक्राउ परेका दुवै जनामाथि कर्तव्य ज्यान सम्बन्धी कसुरमा अनुसन्धान भइरहेको प्रहरीले जानकारी दिएको छ।
